प्रतिनिधिसभा विघटन मुद्दामाथि संवैधानिक इजलासमा आज पनि बहस

काठमाडौं । प्रतिनिधिसभा विघटन विरुद्धको मुद्दामाथि आज पनि संवैधानिक इजलासमा बहस सुरु भएको छ ।

इजलास बसेसँगै रिट निवेदनका तर्फबाट अधिवक्ता दीनमणि पोखरेलले बहस गरेका छन् ।

मुद्दामाथि आइतबारबाट बहस सुरु भएको थियो । आइतबारको बहसमा वकिलहरु र इजालासबीच सवाल जवाफ समेत चलेको थियो । प्रधानन्यायाधीस चोलेन्द्र शमशेर जबराले संविधानको धारा ७६ को उपधारा ७ बमोजिम प्रधानमन्त्रीले संसद विघटन गर्न किन पाउँदैनन भनेर बहसमा सहभागी वकिलहरुलाई बारम्बार प्रश्न गरिरहेका थिए ।

प्रधानमन्त्री केपी शर्मा ओलीले दुई तिहाई बहमुत नहुँदा सरकारले राम्रो काम गर्न नसकेको जिकिर गर्दै प्रतिनिधिसभा भंगका लागि राष्ट्रपतिलाई सिफारिस गरेका थिए ।

राष्ट्रपतिले तत्कालै सिफारिस सदर गर्दै आगामी बैशाख १७ र २७ गते निर्वाचन मिति घोषणा गरेकी थिइन । त्यसविरुद्ध अदालतमा १३ वटा रिट परेका थिए । रिटमाथि आइतबारदेखि नियमित सुरुवाइ सुरु भएको हो ।