रुपन्देहीमा एकजना पुरुषको आगो लगाई हत्या

बुटवल । रुपन्देहीको मर्चवारमा एक जनाको आगोमा जलाएर हत्या भएको छ। अन्दाजी ३५ वर्षका पुरुषको जलेर मृत्यु भएको अवस्थामा शव फेला परेको छ ।

जिल्ला प्रहरी कार्यालय रुपन्देहीका अनुसार मायादेवी गाउँपालिका ७ गरकट्टी स्थित दानव नदीको किनार नजिकै खेतमा आगो लगाएर जलेको शव फेला परेको रुपन्देही प्रहरीले जनाएको छ ।

प्रहरीका अनुसार खेतमा फेला परेको शव आंशिक रुपमा जलेको छ। घटनास्थलमा रगत र प्लाष्टिकको पाइप पनि भेटिएको छ।

घटनामा संलग्न दोषीको पहिचान हुन नसेकाले नेपालगञ्जबाट तालिम प्राप्त कुकुर ल्याएर अनुसन्धान शुरु गरिएको रुपन्देही प्रहरी प्रवक्ता सत्यनारायण थापाले बताए । शवको सनाखतका लागि १ सय भन्दा बढी स्थानीयलाई बोलाएपनि सनाखत हुन नसकेको उनले बताए।

शवलाई पोष्टमार्टमका लागि लुम्बिनी प्रादेशिक अस्पताल बुटवल लगिएको छ भने घटनाका बारेमा अनुसन्धान भइरहेको प्रहरीले जनाएको छ ।