काठमाडौं । विश्वकै दोस्रो अग्लो हिमाल ‘माउन्ट केटु’का सफल नेपाली आरोहीलाई पाकिस्तानी दूतावासले सम्मान गरेको छ ।
काठमाडौंस्थित पाकिस्तानी दूतावासले एक कार्यक्रमको आयोजना गरी आरोहीहरुको सम्मान गरेको हो ।
नेपाली आरोहीहरुले पाकिस्तानमा रहेको माउन्ट केटुको शितकालीन आरोहण सफलतापूर्वक सम्पन्न गरेका थिए । निर्मल पुर्जाको नेतृत्वमा रहेका १० जना नेपाली आरोहीले गत माघ ३ गते माउन्ट केटुको आरोहण सम्पन्न गरेर ऐतिहासिक कीर्तिमान कायम गरेका थिए ।
त्यसअवसरमा बोल्दै नेपालका लागि पाकिस्तानी राजदूत (नियुक्त) सौयद हैदर शाहले नेपाली पर्वतारोही टोलीको असाधारण सफलताको प्रशंसा गर्दै बधाई दिए । राजदूत शाहले इतिहासको स्मरण गर्दै भने, ‘विश्वको दोस्रो उच्च शिखर हिउँदे याममा आरोहणको प्रयासहरु यसअघि दुर्भाग्यवस असफलमा समाप्त भएका थिए । तर, नेपालका आदिवासी हिमालय पर्वतारोहीहरूको अनुकरणीय साहस, दृढता र टीम वर्कले नयाँ विश्व कीर्तिमान स्थापित गरेको छ ।’ यो सफलताले पाकिस्तान र नेपालबीचको मैत्री सम्बन्धलाई थप मजबुद बनाएको पनि उनले उल्लेख गरे ।
त्यसअवसरमा आरोहण दलका सदस्यहरुले पाकिस्तानको दूतावासलाई उनीहरू आराहणको समर्थन र सफलताको मान्यताका लागि लागि धन्यवाद दिए। उनीहरूले पाकिस्तानमा रहँदा पाकिस्तानी राष्ट्रपति, प्रधानमन्त्री, सेना प्रमुख र जनताको न्यानो एवं अविस्मरणीय स्वागतको सम्झना पनि गरेका थिए ।
त्यसक्रममा राजदूत शाहले आरोहण टोलीका लिडर निर्मल पूर्जा र मिङ्मा ग्यालजे शेर्पालाई स्मृति चिन्ह प्रदान गरेका थिए ।
स्वागत समारोहमा नेपाल पर्यटन बोर्डका सीईओ धनन्जय रेग्मी, नेपाल पर्यटन उद्योगका अन्य प्रतिष्ठानहरू र वरिष्ठ अधिकारीहरू पनि स्वागत समारोहमा उपस्थित भएका थिए ।
प्रतिक्रिया