काठमाडौं । पाँच घण्टा प्रहरी हिरासतमा बसेर रिहा भएकी नेकपा केन्द्रीय सदस्य रामकुमारी झाँक्रीले राष्ट्रपतिबारे आफुले दिएको अभिव्यक्तिमा कुनै पश्चाताप नभएको बताएकी छिन् ।
प्रहरी हिरासतबाट रिहाइपछि झाँक्रीले राष्ट्रपति विद्यादेवी भण्डारीका गतिविधिप्रति आफुले टिप्पणी गरेको भन्दै त्यसमा कुनै पश्चात्ताप नभएको बताएकी हुन् । संवैधानिक राष्ट्रपतिको संस्थाप्रति आफ्नो सधैं सम्मान रहेको बताउँदै झाँक्रीले त्यो पदमा रहने व्यक्तिका क्रियाकलापको आलोचना गर्दा कुनै पश्चात्ताप नहुने प्रष्ट पारिन ।
झाँक्रीले आफु लोकतन्त्रको पक्षमा सधैंभर लडिरहेको बताउँदै संविधान र लोकतन्त्रको धज्जी उडाउनेहरु विरुद्ध बोलिरहने प्रतिवद्धता जनाइन । उनले भनिन, ‘जसले संविधानको धज्जी उडाउँछ, विधिलाई मान्दैन त्यस्ता प्रवृत्तिको विरुद्ध आज पनि सडकमा छौं ।’
नेतृ झाँक्रीले ठूलो आन्दोलन र लडाईंले स्थापित गरेको राष्ट्रपति संस्थाप्रति सधैं सम्मान रहिरहने बताइन । तर त्यहाँ पुग्ने पात्रहरूले देखाउने प्रवृतिले संविधान र कानुनको धज्जी उडाउँछन् भने ति विरुद्धको लडाईं सडकमा बाँकी रहने बताइन ।
राष्ट्रपतिप्रति अभिव्यक्ति दिएको आरोप लगाउँदै प्रहरीले राज्यविरुद्धको कसुरमा झाँक्रीलाई बिहीबार बिहान उनकै निवासबाट पक्राउ गरेको थियो । तर, चौतर्फी विरोधपछि सरकारले उनलाई पाँच घण्टामै रिहा गर्न बाध्य भएको छ ।
प्रतिक्रिया