कांग्रेस नेता जोशीको मस्तिष्कको अपरेशन सम्पन्न

काठमाडौँ । मस्तिष्कघात भएका कांग्रेस नेता तथा पूर्वमन्त्री नवीन्द्रराज जोशीको अपरेशन गरिएको छ ।

मस्तिष्कघात भएपछि नर्भिक अस्पतालमा उपचार गरिरहेका जोशीलाई आईसीयूको भेन्टिलेटरमा राखेर उनको उपचार गरिँदैछ ।

न्युरोसर्जन डा. राजीव झासहितको चिकित्सकको टोलीले अपरेशन गरेको हो । उच्च रक्तचापका कारण जोशीलाई मस्तिष्कघात भएको झाले बताए । मस्तिष्कको अति संवेदनशील भागमा जमेको रगतलाई शल्यक्रिया गरेर पनि निकाल्न नसक्ने चिकित्सकले बताएका छन् ।

डा. झाका अनुसार जोशीको सानो शल्यक्रिया गरेर मस्तिष्कमा पर्ने चाप घटाउन ड्रेन गर्न पाइप राखिएको छ । यो निकै जटिल अवस्था हो । यस्ता खालका बिरामीलाई बचाउन निकै कठिन हुने चिकित्सकले बताएका छन् ।

जोशीलाई बिहीबार रातिदेखि शरीरको देब्रेपट्टिको भागमा समस्या देखिएको थियो । त्यसपछि वीर अस्पतालमा भर्ना गरिएको थियो । शुक्रबार बिहान उनलाई नर्भिकमा सारिएको हो ।