काठमाडौं । प्रधानमन्त्री केपी शर्मा ओलीले आफुहरुले कसैलाई पनि प्रधानमन्त्री बनिदेऊ भन्दै विन्ती गर्दै नहिँडेको बताएका छन् ।
सरकार र विप्लव समुहबीच आयोजित सहमतिपत्रमा हस्ताक्षर समारोहलाई सम्बोधन गर्दै प्रधानमन्त्री ओलीले कसैलाई पनि आफुले प्रधानमन्त्रीको प्रस्ताव नगरेको बताएका हुन् ।
ओलीले पुष्पकमल दाहाल प्रचण्ड र माधव कुमार नेपालप्रति व्यङ्गात्मक टिप्पणी गर्दै केही मान्छेहरु हुँदा खाँदाको दुई तिहाई बहुमतको सरकार गिराएर प्रधानमन्त्री बनिदेऊ भन्दै अरुको दैलोमा भीख माग्दै हिँडेको बताए । ओलीले भने, ‘आफ्नो पार्टी फुटाएर,सरकार ढालेर अरुलाई बनिदेऊन भन्दै हिडेका छन् बिचराहरू ।
प्रधानमन्त्री ओलीले आफूहरूले कसैलाई पनि प्रधानमन्त्रीको प्रस्ताव नराख्ने स्पष्ट पारे । उनले थपे, ‘हामीले अनुचित ढंगले कसैलाई प्रधानमन्त्रीको प्रस्ताव राख्ने वाला छैनौं । कसैलाई प्राधानमन्त्री पद प्रस्ताव राखेका पनि छैनौं ।’
प्रधानमन्त्री ओलीले संसदीय दलको नेता आफै भएको जिकिर गरे । ‘आज संसदीय दलको बैठक भन्दैछन् रे’, उनले भने, ‘दलको नेता म यहाँ छु, कुन दलको बैठक हो कुन्नि मलाई थाहा छैन ।’
प्रधानमन्त्री ओलीले विप्लव नेकपा शान्तिपूर्ण राजनीतिमा प्रवेश गरेपछि अब नेपाल शान्तिपूर्ण युगमा प्रवेश गरेको दाबी गरे । उनले नेपालमा अब कसैले हिंसात्मक आन्दोलनका बाटो नलिने बताए । ओलीले भने, भने, ‘अब कुनै पनि पार्टीले हिंसात्मक बाटो र कार्यदिशा अवलम्बन गरेको छैन अब नेपालमा हिंसात्मक द्वन्द्व छैन, शान्ति छ ।’ नेपाल शान्तिको पारामिटरमा अमेरिका, चीन भन्दा पनि माथि रहेको उनले बताए ।
प्रधानमन्त्री ओलीले विप्लवको प्रशंसा गर्दै उनले साहासिक काम गरेको जनाए । शान्तिपूर्ण राजनीतिको बाटो समातेर विप्लवले सेफल्याण्डिङ गरेको उनको भनाइ थियो ।
प्रतिक्रिया