काठमाडौं । कोरोना भाइरस संक्रमणविरुद्ध दोस्रो प्राथमिकताको पहिलो चरण आजबाट सुरु हुँदैछ ।
प्रधानमन्त्री केपी शर्मा ओलीलाई खोप लगाएर दोस्रो चरणको अभियान शुरु गरिने भएको छ । प्रधानमन्त्री ओलीले आइतबार बिहान शिक्षण अस्पतालमा खोप लगाउने तय भएको छ ।
दोस्रो प्राथमिकतामा रहेका ५५ वर्ष उमेर माथिका साथै विश्वविद्यालय र विद्यालयका शिक्षक कर्मचारीलाई खोप लगाइने छ । यस्तै सार्वजनिक सवारीसाधनका चालक र सहचालकलाई पनि प्राथमिकतामा राखिएको छ । ती सबैको संख्या करिब ४२ लाख रहेको स्वास्थ्य सेवा विभागको आकलन छ ।
यो चरणमा १५ हजारभन्दा बढी जनशक्ति परिचालन गरी ४२ लाखलाई खोप लगाउने छन । यस्तै स्वास्थ्य तथा जनसङ्ख्यामन्त्री हृदयेश त्रिपाठीले कोरोनाविरुद्धको खोप सबै जनताको पहुँचमा पुर्याउने प्रयास भइरहेको बताएका छन ।मन्त्री त्रिपाठीले भारतमा उत्पादन भएको कोभिशिल्ड खोपको ५० लाख मात्रा किन्ने प्रक्रियासमेत शुरु भइसकेको जानकारी दिए ।
यसअघि सरकारले भारत सरकारको अनुदानमा १० लाख मात्रा खोप र खरीद गरेको १० लाख मात्रा खोप आइसकेको छ भने १० लाख मात्रा खोप भारतबाट आउने प्रक्रियामा रहेको उनको भनाइ छ । २० दिनसम्म चल्ने खोप अभियानमा १६ हजार ज्येष्ठ नागरिकलाई खोप प्रदान गरिने सरकारको योजना छ ।
प्रतिक्रिया