काठमाडौं । सत्ता समीकरणका विषयमा नेकपा माओवादी केन्द्र र जनता समाजवादी पार्टी (जसपा)का नेताहरुबीच भेटवार्ता भएको छ ।
माओवादी केन्द्रका नेताहरुसँग छलफल गर्न जसपाका अध्यक्ष महन्थ ठाकुर र वरिष्ठ नेता राजेन्द्र महतो पेरिसडाँडा पुगेका छन् ।
माओवादी केन्द्रको बुधबार बसेको स्थायी कमिटी बैठकले नयाँ सत्ता समीकरणका लागि काँंग्रेस र जसपासँग छलफल अघि बढाउने निर्णय गरेको थियो । माओवादी केन्द्रले अन्य दलसँग छलफल गर्न अध्यक्ष प्रचण्ड र नेता नारायणकाजी श्रेष्ठलाई जिम्मा दिएको छ ।
जसपाले भने आफ्ना माग जसले पुरा गर्छ उसैसँग सहकार्य गर्ने नीति लिएको छ । सत्ता समीकरणमा निर्णायक बनेको जसपाका पूर्व राजपा निकट नेताहरुले हिजो मात्रै प्रधानमन्त्री केपी शर्मा ओली निकट एमाले नेताहरुसँग छलफल गरेका थिए । तर, दिउँसो बसेको संसदीय दल बैठकमा त्यसबारे व्यापक आलोचना भएपछि छलफलका लागि कार्यदल बनाउने निर्णय गरेको थियो ।
जसपाका नेताहरुसँग आज पनि एमालेका नेताहरुले छलफल गरेका छन् ।
प्रतिक्रिया