धनगढीमा एमालेका ओली र नेपाल पक्षबीच झडप

धनगढी । धनगढीमा नेकपा एमालेका दुई गुटबीच झडप भएको छ ।

पार्टी कार्यालय स्थापनाको क्रममा एमालेका भीम रावल र कर्णबहादुर थापा पक्षीय कार्यकर्ताहरुबीच झडप भएको हो । भीम रावल नेपाल पक्षधर नेता हुन भने थापा ओली पक्षधर नेता हुन् ।

चटकपुरस्थित तत्कालिन नेकपाको सुदूरपश्चिम प्रदेश कार्यालयमा एमालेको बोर्ड राख्ने क्रममा थापा पक्षका कार्यकर्ताले रावलको नेमप्लेट हटाएर लेखराज भट्टको नाम राखेपछि विवाद बढ्दै जाँदा भनाभनको क्रम हात हालाहालमा पुगेको थियो ।

रावल पक्षका कार्यकर्ताले बिहान नेकपा एमालेको बोर्ड र प्रदेश इन्चार्ज रावलको नेम प्लेट झुण्डयाएका थिए । तर, दिउँसो थापा पक्षीय कार्यकर्ताहरु गएर अर्को बोर्ड झुण्डयाएका थिए । उनीहरुले प्रदेश इन्चार्जमा भट्टको नेम प्लेट राखेका थिए ।

सुदुरपश्चिमकै अछाम जिल्लामा रावल र थापा पक्षधरबीच केही समय अघि झडप भएको थियो । धनगढीमा पनि झडप हुनसक्ने भन्दै बिहानैदेखि पार्टी कार्यालय आसपास प्रहरी परिचालन भएको थियो । रावल र थापा पक्षधरबीच सदुरपश्चिममा कटुतापूर्ण सम्बन्ध रहँदै आएको छ ।