काठमाडौं । नेकपा माओवादी केन्द्रको केन्द्रीय समिति बैठक भोलि पनि बस्ने गरी स्थगित भएको छ ।
पार्टी कार्यालय पेरिसडाँडामा आइतबार बसेको बैठकमा अध्यक्ष पुष्पकमल दाहाल प्रचण्डले नयाँ परिस्थितिमा पार्टीको पुनर्गठन र समसामयिक राजनीतिक घटनाक्रमबारे जानकारी गराएका छन् ।
बैठकमा पार्टीको नाम फेर्ने, पार्टी अनुशासन उल्लंघन गरी एमालेमा गएका २३ नेतामाथि कारवाही गर्ने लगायतका एजेण्डामा छलफल सुरु भएको छ ।
आजको बैठकमा सातै प्रदेशका इन्चार्जहरुले रिपोर्टिङ गरेको नेता नारायणकाजी श्रेष्ठले बताए । बैठकमा सदुरपश्चिम प्रदेशबाट नेपबहादुर चौधरी, कर्णाली प्रदेशबाट माया शर्मा, लुम्बिनी प्रदेशबाट ओनसरी घर्ती, गण्डकी प्रदेशबाट हितराज पाण्डे, बागमती प्रदेशबाट नारायण दाहाल, प्रदेश २ बाट विश्वनाथ साह र प्रदेश १ बाट सावित्री भुसालले रिपोर्टिङ गरेको श्रेष्ठले बताए।
आजको बैठकमा पार्टी छोडेर गएका सांसदहरुलाई के कारवाही गर्ने भन्ने बारेमा पनि छलफल भएको छ । कानुनी प्रश्न उठ्न नसक्ने गरी विधि पुर्याएर पार्टी छोडेका संघ र प्रदेशका सांसदहरुलाई कारवाही गर्ने विषयमा छलफल भएको छ ।
प्रतिक्रिया