काठमाडौं । संसदीयदलको बैठक सम्पन्न भए लगत्तै नेकपा एमालेको केन्द्रीय कमिटी बैठक सुरु भएको छ । नेपाल पक्षका ५ नेतालाई कारवाही गर्ने, बिधान संसोधनको प्रस्ताव केन्द्रीय कमिटी पठाउने र संसदीय बोर्डलाई सक्रिय बनाउने निर्णय गर्दै सकिएको संसदीय दलको बैठकको केही घण्टापछि केन्द्रीय समिति बैठक सुरु भएको हो ।
संसदीयदलको बैठकमा उपस्थित भएर प्रचण्डको आलोचना गरेर निस्केका साबिक एमाले उपाध्यक्ष बामदेव गौतम केन्दीय कमिटी बैठकमा भने अनुपस्थित भएका छन् । प्रधानमन्त्री निवास बालुवाटारमा सुरु भएको बैठकमा नेपाल पक्षका केन्द्रीय सदस्यहरु भने अनुपस्थित रहेका छन् ।
गत फागुन २८ मा केन्द्रीय समितिको ओली पक्षीय बैठकले अध्यक्ष र महासचिव पदबाहेक अन्य पद पदाधिकारीको पद खारेज गरेको भन्दै नेपाल पक्षका नेताहरु बैठकमा अनुपस्थित भएका हुन् ।
ओलीले एक पक्षीय रुपमा बैठक बोलाएर विधान विपरितको निर्णय गरेको भन्दै नेपाल समूहले विरोध गर्दै आएको छ भने आजको केन्द्रीय समिति बैठक पनि बहिस्कार गर्ने शुक्रबार नै निर्णय गरेको थियो । उनीहरुले आजै सहभागी हुन नसक्नुको कारण सहितको पत्र बालुवाटार पुगेर ओलीलाई बुझाईदिन आग्रह गरेर फर्केका थिए ।
प्रतिक्रिया