कांग्रेस पदाधिकारी बैठकमा सरकार निर्माणबारे छलफलै भएन

काठमाडौं । नेपाली कांग्रेसको पदाधिकारी बैठकमा सत्ता साझेदारीको विषयमा कुनै छलफल नै नभएको नेता रमेश लेखकले बताएका छन् ।

सानेपास्थित पार्टी कार्यालयमा सोमबार बसेको पदाधिकारी तथा पूर्वपदाधिकारी बैठकमा सरकार गठनबारे कुनै छलफल नभएको लेखकले दाबी गरेका छन्।

संचारकर्मीहरुसँग कुरा गर्दै नेता लेखकले आवश्यक परे पार्टीले सरकारको नेतृत्व गर्ने भएपनि अहिले अवस्था परिपक्क नबनेको बताए

नेपाली कांग्रेस भित्रैबाट वरिष्ठ नेता रामचन्द्र पौडेल र कृष्ण सिटौला पक्षधरबाट प्रधानमन्त्री केपी शर्मा ओलीको विकल्प खोज्नुपर्ने आवाज उठिरहेको छ । तर, सभापति देउवाले भने अझै पनि परिस्थिति परिपक्क नबनिसकेको बताउँदै आएका छन् ।

‘सरकार बनाउनका लागि परिस्थिति सुनिश्चित र अवस्था परिपक्क भइसकेको छैन’, नेता लेखकले भने, ‘कांग्रेसले सरकारको नेतृत्व गर्ने कुरा परिपक्क हिसावले निर्णय गर्नुपर्छ । सरकारलाई नेतृत्व दिन भने तयार नै छौं।’