काठमाडौं । नेकपा एमालेका नेपाल खनाल पक्षीय केन्द्रीय सदस्यहरुको बैठक जारी छ ।
काठमाडौंको कलंकीस्थित एक पार्टी प्यालेसमा सुरु भएको बैठकमा पार्टीभित्रको अवस्था र अबको रणनीतिबारे विशेष छलफल हुने बताइएको छ ।
पार्टीको संस्थापन पक्षले वरिष्ठ नेता नेपालसहित चार जना नेताहरुलाई स्पष्टीकरण सोधेपछि अबको रणनीतिबारे विशेष छलफल हुने एक नेताले बताए । ओली पक्षले सोधेको स्पष्टीकरणको जवाफमा नेता नेपाल र भीम रावलले प्रतिप्रश्न गर्दै पत्र पठाइसकेका छन् । घनश्याम भुसाल र सुरेन्द्र पाण्डेले पनि आफुहरुले पठाउने पत्र तयार पार्दै गरेको जनाएका छन् ।
बैठकमा आजै संस्थापन पक्षले बोलाएको संसदीय दलको बैठकमा जाने या नजाने भन्ने विषयमा पनि टुंगो लाग्नेछ । दिउँसो ३ बजे प्रधानमन्त्री एवं संसदीय दलका नेता केपी शर्मा ओलीले बोलाएको बैठकमा सहभागी बन्नुपर्ने धेरै जसो नेताहरुको राय रहेको छ ।
एमालेभित्र फागुन २३ यता चर्किएको अन्तसंघर्ष फुटको स्तरसम्म पुगेको छ । अध्यक्ष ओलीले नेपाल खनाल पक्षधरहरुलाई विगतमा नेकपा हुँदा आफुलाई असहयोग गरेको प्रतिशोध साँध्न निरन्तर पेलिरहेका छन् ।ओलीले नेपाल खनालहरु एमालेबाट छिटोभन्दा छिटो बाहिरिउन भन्ने नै चाहेका छन् ।
तर, नेपाल खनाल पक्षले भने अझै पनि ओली विरुद्ध पार्टीभित्रै अन्तर्सघर्ष गर्ने मनस्थितिमै रहेको छ । यद्यपी, पार्टी र जनवर्गीय संगठनका तल्लो कमिटीसम्म समानान्तर संरचना बनाउने क्रम भने जारी छ ।
प्रतिक्रिया