काठमाडौं । नेकपा एमालेले पार्टीका वरिष्ठ नेता माधवकुमार नेपाल एवं उपाध्यक्ष भीम रावललाई कारवाही गरेको छ ।
अध्यक्ष केपी शर्मा ओली पक्षको वर्चस्व रहेको एमालेले वरिष्ठ नेता नेपाल र उपाध्यक्ष रावललाई ६ महिनाका लागि पार्टी सदस्यबाट निलम्बन गरेको हो । अध्यक्ष ओलीले दुवै नेतालाई पार्टी हित विपरित गतिविधि गरेको भन्दै कारवाही गरेको पत्र पठाएका छन् ।
सर्वोच्च अदालतले साविकको नेकपा खारेज गर्दै पूर्ववत नेकपा एमाले ब्यूँताइदिएपछि प्रधानमन्त्री एवं पार्टी अध्यक्ष ओलीले नेपाल पक्षमाथि पेल्न सुरु गरेका थिए ।
साविक नेकपा हुँदा आफुमाथि कारवाही गरेको प्रतिशोध साँध्न ओलीले फागुन २८ गते आफु निकटमात्रै केन्द्रीय सदस्यहरु बोलाएर त्यसैलाई केन्द्रीय कमिटीको बैठक भन्दै पदाधिकारी खारेजको निर्णय र केन्द्रीय कमिटीलाई महाधिवेशन आयोजक कमिटीमा रुपान्तरण भएको घोषणा गरेका थिए । ओलीले सोही बैठकबाट आफुलाई साथ दिने माओवादी केन्द्रका २३ नेतालाई केन्द्रीय सदस्यमा चयन गरेका थिए ।
त्यसको विरोध गर्दै चैत्र ४ र ५ गते नेपाल पक्षले राष्ट्रिय भेलाको आयोजना गरेको थियो । त्यसको अगुवाई नेपाल र रावलले गरेका थिए । एमालेभित्र आफ्नो चर्को आलोचक रहेका नेपाल र रावललाई कारवाही गरेर ओलीले नेपाल निकट अन्य नेताहरुलाई कारवाही सहने या चुपचाप गल्ती स्वीकार्दै आफ्नो पक्षमा आउन चेतावनी दिएका छन् ।
प्रतिक्रिया