काठमाडौं । सत्ता समीकरणमा निर्णायक खेलाडी मानिएको जनता समाजवादी पार्टी जसपाको पदाधिकारी बैठक जारी छ ।
पार्टी कार्यालय बालकुमारीमा सुरु भएको बैठकमा नेपाली कांग्रेसले राखेको सत्ता सहकार्यको प्रस्ताव र प्रधानमन्त्री केपी शर्मा ओलीले समेत राखेको सहकार्यको प्रस्तावमा छलफल हुने बताइएको छ ।
शिर्ष ६ नेता सम्मिलित पदाधिकारी बैठकले गर्ने निर्णयले राजनीतिक कोर्ष कता अघि बढ्छ भन्नेबारेमा पनि निक्र्यौल हुनेछ ।
गत शुक्रबार नेपाली कांग्रेसका सभापति शेरबहादुर देउवाले माओवादी केन्द्र र जसपासम्मिलित संयुक्त बैठकमा आफ्नो नेतृत्वमा सरकार गठन गर्न प्रस्ताव गरेका थिए । तर, जसपाभित्र पूर्व राजपाका नेताहरु महन्थ ठाकुर, राजेन्द्र महतो र लक्ष्मणलाल कर्ण पक्षधरहरु भने प्रधानमन्त्री केपी ओलीले आफ्ना माग पुरा गरे उनीसँगै सहकार्य गरेर अघि बढ्नुपर्ने पक्षमा रहेका छन् ।
उपेन्द्र यादव, डा. बाबुराम भट्टराई र अशोक राई पक्ष भने ओलीलाई कुनै पनि हालतमा समर्थन गर्न नहुने भन्दै सकेसम्म आफ्नै नेतृत्वमा सरकारको पहल गर्ने, त्यो नभए देउवालाई समर्थन गरेर भएपनि ओलीलाई प्रधानमन्त्रीबाट हटाउनुपर्ने अडानमा रहेका छन् ।
प्रतिनिधिसभाको अंकगणित अनुसार जसपाले जता समर्थन गर्छ उसैको सरकार बन्ने अवस्था रहेको छ ।
प्रतिक्रिया