बर्दिया । बर्दियाको गेरुवा गाउँपालिका वडा नं. १ भटेराकी एक वृद्ध महिलाको हात्तीको आक्रमणमा परि मृत्यु भएको छ । मृत्यु हुनेमा ६० बर्षीया भुण्टी बोहोरा रहेकी छन् ।
घर छेउमा रहेको सालझुण्डी मध्यवर्ती सामुदायिक वनको छेउमा रहेको शेरबहादुर थारुको खेतमाबाख्रा चराउँदै गर्दा बोहोरालाई हात्तीले आक्रमण गरेको थियो । हात्तीले समातेर दुई सय मिटर जंगलभित्र लगेर मारेको प्रहरीले जनाएको छ ।
हात्तीले आक्रमण गरेको थाहा पाएपछि स्थानीबासीले होहल्ला गरेपछि हात्ती मृतक बोहोरालाई छोडेर भागेको थियो । बोहोराको शवलाई पोष्टमार्टमका लागि राजापुर लैजाने तयारी भैरहेको इलाका प्रहरी कार्यालय पाताभारका प्रहरी निरीक्षक नवराज केसीले बताए ।
यसअघि बर्दियामा बाघको आक्रमणबाट मानिसको मृत्यु हुने गरेपनि लामो समयदेखि हात्तीको आक्रमणबाट मानिसको मृत्यु भएको थिएन ।
प्रतिक्रिया