प्रधानमन्त्री ओलीको आरोप : सभामुखले एमसीसी अघि बढाउन दिएनन

काठमाडौं । प्रधानमन्त्री केपी शर्मा ओलीले संसदमा एमसीसी अघि बढाउन नदिएको भन्दै असन्तुष्टि जनाएका छन् ।

नयाँ वर्षको उपलक्ष्यमा देशबासीका नाममा सम्बोधन गर्दै प्रधानमन्त्री ओलीले सरकारले संसदमा टेबल गरेको एमसीसी विधेयकलाई निर्णयार्थ पेश नगरिएको भन्दै असन्तुष्टि जनाएका हुन । ओलीले सभामुख अग्नि सापकोटाको नाम नलिइकन उनको भूमिकाप्रति असन्तुष्टि जनाए ।

सरकारले ल्याएका कुनै पनि कार्यक्रमलाई रोक्न संसदलाई अधिकार नभएको बताउँदै उनले सभामुखले संविधान नमानेको आरोप लगाए । उनले भने, ‘एमसीसीलाई सरकारले संसदमा लगे पनि निर्णयार्थ प्रस्तुत गर्न दिइएको छैन । सरकारले लगेको विषयलाई संविधान बमोजिम निर्णयार्थ पेश गर्नुपर्ने हो । तर, संविधानै नमान्ने र जिद्दी गर्ने काम भइरहेको छ ।’

प्रधानमन्त्री ओलीले सरकारले एसिड प्रहार र बलात्कार विरुद्ध ल्याएको अध्यादेशलाई संसदमा पेश गर्न नदिएको आरोप लगाए । मुद्दा हालेर संसद ब्यँुताएकाहरुले जनताले माग गरेका ती विधेयक पेश गर्न नदिएको जिकिर गरे । संसद अधिवेशनको पहिलो बैठकमा ती अध्यादेशहरु पेश गर्न नदिँदा कानुन बनाउन अप्ठेरो भएको बताए ।