एजेन्सी । छिमेकी मुलुक भारतमा कोरोना संक्रमण दर झनै तीब्र बनेको छ । पछिल्लो २४ घण्टाभित्र भारतमा २ लाख ३३ हजार ९४३ जना नयाँ संक्रमित थपिएका छन । भारतमा २४ घण्टामा संक्रमण पुष्टि हुनेको यो संख्या अहिलेसम्मकै धेरै हो ।
यसअघि (शुक्रबार) वैशाख ३ मा भारतमा अहिलेसम्मकै दोस्रो धेरै २ लाख १६ हजार ८५० जनामा संक्रमण पुष्टि भएको छ ।
विश्वभरकै आँकडाका अनुसार कुल संक्रमित संख्याका आधारमा दोस्रो स्थानमा रहेको भारतमा कोरोना संक्रमितको संख्या यो समाचार तयार पार्दासम्म एक करोड ४५ लाख २१ हजार ६८३ पुगेको छ ।
पछिल्लो २४ घण्टामा १३ सय ३८ जनाको मृत्यु भएसँगै कोरोना संक्रमणका भारतमा मृत्यु हुनेको कुल संख्या एक लाख ७५ हजार ६७३ पुगेको छ । संक्रमितमध्ये एक करोड २६ लाख ६६ हजार ८८९ जना निको भइसकेका छन् भने १६ लाख ७९ हजार १२१ सक्रिय संक्रमित रहेका छन ।
विश्वमा कुल संक्रमितका आधारमा अगाडि रहेको अमेरिकामा तीन करोड २३ लाख ५ हजार ५९५ संक्रमित रहेका छन । पछिल्लो २४ घण्टामा त्यहाँ ८१ हजारभन्दा बढी संक्रमित थपिएका छन् भने ८८४ जनाको मृत्यु भएको छ ।
कोरोना संक्रमणका हिसाबले तेस्रो स्थानमा रहेको ब्राजिलमा भने एक करोड ३८ लाख ३४ हजार ३४२ संक्रमित रहेका छन । त्यहाँ पछिल्लो २४ घण्टामा ७६ हजार २४९ संक्रमित थपिँदा ३ हजारभन्दा बढीको मृत्यु भएको वर्ल्डोमिटरले जनाएको छ ।
प्रतिक्रिया