काठमाडौं । गृहमन्त्री रामबहादुर थापाको राष्ट्रियसभा सांसद पद खारेज भएको छ । गृहमन्त्री थापाको पद रिक्त भएको संसद सचिवालयले जनाएको छ ।
केही दिनअघि नेकपा माओवादी केन्द्रका राष्ट्रिय सभा दलका नेता दीनानाथ शर्माले थापाले दल त्याग गरेको पत्र संसद सचिवालयमा दिएका थिए । सम्बन्धित पार्टीले दल त्याग ऐन अनुसार कारवाही प्रक्रिया अघि बढाएर लिखित पत्र दिएपछि दल त्याग हुन्छ ।
राष्ट्रिय सभाका अध्यक्ष गणेशप्रसाद तिमिल्सिना विदेशमा भएका कारण थापाको पद केही दिन बचेको थियो ।
यससँगै थापा गृहमन्त्रीबाट समेत स्वतः पदमुक्त भएका छन् । तर, सांसद नभएपनि ६ महिना मन्त्री बन्न पाउने संवैधानिक व्यवस्था अनुसार प्रधानमन्त्री केपी शर्मा ओलीले थापालाई तत्कालै गृहमन्त्रीमा पुनर्नियुक्ति दिनेछन् । राष्ट्रिय सभाकै अर्का सदस्य चन्द्रबहादुर खड्काको पनि पद रिक्त हुनेभएको छ ।
यसअघि प्रतिनिधिसभामा रहेका टोपबहादुर रायमाझी, लेखराज भट्ट, प्रभु साह र गौरी शंकर चौधरीको पद रिक्त भएको थियो ।
थापासहित सबै सांसदहरु नेकपा माओवादी केन्द्र पार्टी परित्याग गरी नेकपा एमालेमा प्रवेश गरेका थिए ।
प्रतिक्रिया