काठमाडौं । नेकपा एमालेको माधवकुमार नेपाल पक्षले आफु निकट सांसदहरुको आकस्मिक भेला बोलाएको छ ।
पार्टी अध्यक्ष एवं संसदीय दलका नेता केपी शर्मा ओलीले नेपाल निकट सांसदहरुलाई कारवाहीको चेतावनीसहित लिखित स्पष्टीकरण सोधेपछि सो समुहले आकस्मिक भेला बोलाएको हो । नेपाल निकट ३५ जना सांसदहरु भएपनि बाँकी सांसदहरुलाई भने ओलीले स्पष्टीकरण सोधेका छैनन् ।
नयाँ परिस्थितिमा कसरी अगाडि बढ्ने भन्ने विषयमा छलफल गर्न भेला बोलाइएको हो । ओलीले नेपाल पक्षधर सांसदहरुलाई कारवाही गर्न पार्टी संसदीय दलको विधान परिवर्तन गरेका छन् । तर, ओलीले नेपाल निकट समानुपातिक सांसदहरुलाई तत्कालै हटाउन सके पनि प्रत्यक्ष निर्वाचित सांसदहरुलाई हटाउन भने त्यति सजिलो छैन ।
प्रत्यक्ष निर्वाचित सांसदहरुलाई हटाउन उनीहरुले संसदीय दलको ह्वीप उल्लंघन गरेको या दल त्याग गरेको अवस्था आउनुपर्छ । नेपाल पक्षधर सांसदहरुलाई समानान्तर गतिविधि गरेको आरोप ओलीले स्पष्टीकरणमा त्यसैलाई दल त्याग गरेको आधार बनाउन खोजेका छन् । तर, नेपाल निकट नेताहरु कसैले पनि एमाले दल परित्याग गरेका छैनन् नत उनीहरुले नयाँ पार्टी नै बनाएका छन् ।
प्रतिक्रिया