नवलपुर । पूर्वी नवलपरासीको भारतसँग जोडिएको दक्षिणी सीमावर्ती त्रिवेणी नाका बन्द गरिएको छ ।
नवलपुरमा पहिलो पटक कोरोनाको संक्रमण देखिनासाथ बन्द भएर खुलेको त्रिवेणी नाका कोरोनाको दोस्रो लहर देखिन थालेपछि पुनः बन्द गरिएको छ ।
कोरोना संक्रमण तीब्र भएको भन्दै नवलपुरका सबै पालिकाहरुले छुट्टाछुट्टै सूचना निकालेर कडाइ गर्ने निर्णय गरेपछि त्रिवेणी नाका बन्द गरिएको हो । भारत जाने र नेपाल आउन चाहने सबैलाई प्रवेश निषेध गरिएको छ । खुला सीमाका कारण हुने अवैध आवत जावत बन्द गरिएको नवलपुर प्रशासनले जनाएको छ ।
केही दिनयता पूर्वी नवलपरासीमा कोरोना संक्रमण ह्वात्तै बढेको छ । जिल्लाको मध्यबिन्दु जिल्ला अस्पतालमा पीसीआर परीक्षण गर्दा दैनिक जसो संक्रमित भेटिएको छ ।
नवलपुरमा जिल्ला अस्पताल मध्यबिन्दु अस्पतालमा ६ बेडको आइसोलेसन कक्ष र ६ बेडको आइसीयु कक्ष तयारी अवस्थामा राखिएको अस्पतालका सूचना अधिकारी छबिलाल सुवेदीले बताए ।
पूर्वी नवलपरासीमा अहिलेसम्म सक्रिय संक्रमितको संख्या ५७ पुगेको स्वास्थ्य कार्यालय नवलपुरका प्रमुख केशवप्रसाद चापागाईंले जानकारी दिए ।
संक्रमितमध्ये २ जना मध्यबिन्दु जिल्ला अस्पतालकै आइसोलेशनमा रहेका छन् भने अन्य सबै होम आइसोलेशनमा रहेका छन् ।
सोमबार बसेको नवलपुर जिल्ला स्तरको विपद् व्यवस्थापन समितिको बैठकले जिल्लाभित्रको पालिका स्तरका सबै अस्पताललाई कम्तीमा ५ देखि १० बेडको आइसोलेसन कक्ष तयार गर्न निर्देशन दिएको चापागाईले बताए ।
प्रतिक्रिया