कञ्चनपुरमा घरघरमै कोरोनाको : लेखापढी व्यवसायी देखि पूर्व प्रहरीको पनि कोरोनाबाट मृत्यु

कञ्चनपुर । कञ्चनपुरमा कोरोना महामारीले दैनिक २÷३ जनाको मृत्यु भईरहेको छ । जिल्लामा कोरोना महामारी घरघरमै देखिन थालेको छ भने जिल्लमा मृत्यु दर पनि उच्च देखिएको छ । बिहीबार महाकाली अस्पतालका उपचारार्थ ३ जनाको मृत्यु भएको थियो, भने शुक्रबार पनि बिहानै थप दुई जनाको मृत्यु भएको छ ।

श्वास प्रश्वास, रुघाखोकी र ज्वोरोका लक्षण देखिएपछि उपचारका लागि महाकाली अस्पतालमा आएका लेखापढी व्यवसायी तथा पुर्व प्रहरीको एकै दिन मृत्यु भएको छ । उनीहरु भारतबाट पनि नआएको र भारतबाट आएकाहरुसँग सम्पर्क पनि नगरेको परिवारका सदस्यहरुले बताएका छन् ।

भीमदत्त नगरपालिका १८ महेन्द्रनगरका स्थानीय समेत रहेका लेखापढी कानुन व्यवसायी संघ कञ्चनपुरका ४५ बर्षिया अध्यक्ष र शुक्लाफाँटा नगरपालिका ५ बनसमितिका ५५ बर्षिया पुर्व प्रहरीको एकै दिन मृत्यु भएको हो ।

पूर्व प्रहरीका आफन्तले सरकारले कोरोना महामारी रोकथाम एव नियन्त्रणका लागि पूर्व तयारी नगर्दा समान्य बिरामीमा कोरोना सक्रमित भई मृत्यु भएको बताए । ‘मानिस जन्मेपछि मृत्यु हुन्छ, यो सत्य कुरा हो, तर यत्रो महामारीका सरकारले अस्पतालमा जनशक्ति स्रोत साधन व्यवस्थापन गर्न नसक्नु कस्तो लार्पर्बाही हो ।’ उनीहरुले भने ।

महाकाली अस्पतालमा लगातार दुई दिनमा एक महिला सहित ५ जनाको मुत्यु भएको महाकाली अस्पतालले जनाएको छ ।

भारतबाट आएका सबैको कोरोना परीक्षण नगर्ने र होल्डीङ्ग सेन्टरमा समेत नराखि सिधै बस चढाएर गाँउ पठाउने गरिएका कारण गाँउ गाँउमा कोरोना महामारी फैलिरहेको स्थानीयको भनाई छ ।

उता जिल्ला प्रहरी कार्यालय कञ्चनपुरका निमित्त प्रवक्ता प्रहरी निरिक्षक लालबहादुर बमले भने गड्डाचौकीमा हेल्डीङ सेण्टर बनाएर एन्जिेन परीक्षपछि मात्र भारतबाट आएका नेपालीलाई घर पठाउने गरिएको बताए । ठूलो संख्यामा नेपालीहरु फर्किरहेकाले छिटफुट आफु खुसी निस्केको हुन सक्ने भएपनि प्रहरीले कडाई गरिरहेको उनले बताए ।

कञ्चनपुरमा कोरोना रोकथामका लागि स्थानीय प्रशासनले बिहीबारदेखि एक साताका लागि लकडाउन गरेको छ । गत बर्ष कोरोना रोकथामका लागि तीनै तहका सरकारका प्रतिनिधी र सरकारी संयन्त्रहरु संस्थागतरुपमा कोरोनासंग लडेको भएपनि यस पटक भने कोरोना रोकथामका लागि प्रभावकारी कदम कसैले चालेका छैनन ।