काठमाडौं । नेकपा एमालेको स्थायी कमिटी बैठक बस्न लागेको छ । नेकपा एमालेको स्थायी कमिटी बैठक बालुवाटारमा बस्ने भएको छ।
प्रधानमन्त्री निवास बालुवाटारमा केही बेरमा बैठक बस्न लागेको हो । बैठकमा प्रधानमन्त्री एवं पार्टी अध्यक्ष केपी शर्मा ओलीले संसदमा विश्वासको मत मागेको अवस्थामा कसरी अगाडि बढ्ने भन्ने विषयमा छलफल हुने बताइएको छ । बैठकमा विपक्षी दलहरुको रणनीति असफल बनाउने, विश्वासको मत हासिल हुन नसके निर्वाचनमा जाने अवस्थाको सिर्जना कसरी गर्ने, माधव नेपाल पक्षका सांसदहरुलाई के गर्ने भन्ने विषयमा समेत छलफल हुने बताइएको छ ।
नेपाल निकट सांसदहरुले सामुहिक राजीनामा दिएको अवस्थामा संसदको संख्या घट्छ । त्यस्तो अवस्थामा विपक्षी दलहरुले आफु विरुद्ध पहिले नै अविश्वासको प्रस्ताव दर्ता गरेमा त्यसलाई असफल बनाउने रणनीतिमा समेत छलफल हुनेछ । स्थायी कमिटी बैठकले नेपाल निकट सांसदहरुलाई कस्तो कारवाही गर्दा पार्टीलाई फाइदा हुन्छ भन्ने विषयमा समेत आंकलन हुने बताइएको छ ।
बैठकमा राष्ट्रिय सभा निर्वाचनमा पार्टीका उम्मेदवारलाई जिताउन प्रदेशसभा सांसद र स्थानीय तहका प्रमुख उपप्रमुखहरुलाई नेपाल पक्षमा लाग्न नदिने विषयमा समेत छलफल हुनेछ । हिजो मात्रै विपक्षी गठबन्धनले माधव नेपाल निकट वाम बुद्धिजीवि डा. खिमलाल देवकोटालाई साझा उम्मेदवार बनाउने सहमति गरेका छन् । नेपाल पक्षीय प्रदेशसभा सांसदहरु र स्थानीय तहका प्रमुख उपप्रमुखहरुले देवकोटालाई भोट दिएमा एमालेका उम्मेदवार रामबहादुर थापालाई समस्या पर्ने देखिन्छ ।
अध्यक्ष ओलीले नवौं महाधिवेशनबाट निर्वाचित स्थायी कमिटीलाई आफुखुशी खारेज गर्दै आफु निकट १९ जना नेताहरु समेटेर स्थायी कमिटी गठन गरेका थिए । तिनै १९ सदस्यीय स्थायी कमिटी बैठक बस्न लागेको हो ।
प्रधानमन्त्री ओलीसहितका नेताहरुले हिजोमात्रै काँग्रेस सभापति शेरबहादुर देउवासहितका नेताहरुलाई भेट गरेर सहकार्यको प्रस्ताव गरेका थिए ।
प्रतिक्रिया