काठमाडौं । नेकपा एमालेको विवादले पार्टी बिभाजनको संघारमा पुगेका बेला पार्टीका दोस्रो पुष्ताका नेताहरु घनिभुत छलफलमा जुटेका छन् । पार्टी एकताका बिषयमा अनुदार मानिएका एमाले महासचिव ईश्वर पोखरेलले नेपाल पक्षका नेता योगेश भट्टराईसँग भएको संबादबाट सुरुभएको भेटवार्ता अर्थमन्त्री समेत रहेका विष्णु पौडेल र नेपाल पक्षका नेताहरु सुरेन्द्र पाण्डे र गोकर्ण बिष्ट सम्म पुगेको छ ।
ओली पक्षका नेता पौडेलले बिहिबार नेपाल पक्षका नेता सुरेन्द्र पाण्डे र गोकर्ण विष्टसँग छलफल गरेका छन् ।
काठमाडौंको होटल मेरियटमा अर्थमन्त्री पौडेलसँग पाण्डे र बिष्टको आधा घन्टा छलफल भए पनि बैठक परिणाममुखी नबनेको नेता पाण्डेले प्रतिक्रिया दिएका छन् । पौडेलले आमन्त्रण गरेपछि मेरियतमा गोकर्ण विष्ट र सुरेन्द्र पाण्डे पौडेललाई भेट्न पुगेका थिए ।
भेटमा नेपाल पक्षले राख्दै आएको अध्यक्ष ओली २ जेठ २०७५ को अवस्थामा फर्किनु पर्ने अडान नेता पाण्डेले राखेका थिए भने अर्थमन्त्री पौडेलले अप्रिय निर्णय नलिन आग्रह गरेका थिए । बुधबार मात्र एमाले महासचिव एवं उप प्रधानमन्त्री ईश्वर पोखरेल र नेता योगेश भट्टराईबीच छलफल भएको थियो ।
प्रतिक्रिया