थपियो बाँकेमा निषेधाज्ञा, जेठ ३ गते मध्यराती सम्मका लागि निषेधाज्ञा जारी

नेपालगन्ज । बाँकेमा जारी निषेधाज्ञा आदेशलाई थप एक हप्ताका लागि बढाइएको छ । जिल्ला प्रशासन कार्यालय, बाँकेले सोमबार सूचना जारी गर्दै निषेधाज्ञालाई बढाएर जेष्ठ ३ गते राति १२ बजेसम्म बढाएको हो ।

बैशाख १३ गतेबाट बाँकेका लागु गरिएको निषेधाज्ञाको अवधि सकिएपछि पुनः जिल्ला प्रशासन कार्यालय बाँकेले एक साताका लागि निषेधाज्ञाको अवधी थप गरेको हो । यस अघि जारी गरिएको आदेश आज राती सकिँदै थियो ।

बाँकेमा पहिलो चरणको निषेधाज्ञाको अवधी पुरा भएपनि जिल्लामा संक्रमित थपिने क्रम रोकिएको छैन भने मृत्युदर पनि उच्च रहेको छ । जिल्लामा अक्सिजनको अभाव र अस्पतालमा बेडको अभावमा संक्रमितहरुले सास्ती ब्यहोरिरहेका छन् । प्रशासनले कोरोना संक्रमणको चेन ब्रेक गर्न भन्दै निषेधाज्ञा जारी गरेको हो । बाँकेका प्रमुख जिल्ला अधिकारी शिवराम गेलालले जारी गरेको आदेशमा यस अघिकै मापदण्ड तोकिएको छ ।