काठमाडौं । त्रिभुवन अन्तर्राष्ट्रिय विमानस्थल क्षेत्रभित्र एक महिनासम्म लागू हुने गरी निषेधाज्ञा जारी भएको छ ।
जिल्ला प्रशासन कार्यालय काठमाडौंले बिहीबारदेखि नै लागु हुनेगरी निषेधाज्ञा जारीगरेको हो ।
फागुन १ गते विमानस्थल र आसपासका क्षेत्रमा प्रदर्शन गर्ने घोषणा केही समूह तथा राजनीतिक दलले गरेपछि प्रशासनले उक्त निर्णय लिएको जनाएको छ।
पूर्वराजा ज्ञानेन्द्र शाह जनकपुरबाट काठमाडौं आउनेक्रममा उनको स्वागत गर्न राजावादी समुह र व्यक्तिहरुले समर्थकहरुलाई विमानस्थलमा आउन आह्वान गरेपछि प्रशासनले निषेधाज्ञा लगाएको हो । आदेशअनुसार विमानस्थल हाताभित्र पाँच जनाभन्दा बढी व्यक्ति भेला भएर अनसन, धर्ना, घेराउ, जुलुस, प्रदर्शन तथा सभा जस्ता विरोधका कार्यक्रम गर्न नपाइने व्यवस्था गरिएको छ।
विमानस्थल प्रवेशद्वारको गोल्डेन गेटदेखि आन्तरिक तथा अन्तर्राष्ट्रिय टर्मिनल क्षेत्र, पार्किङ क्षेत्र र परिसरभित्रका सम्पूर्ण सडकसहित सम्पूर्ण विमानस्थल हातालाई निषेधित क्षेत्र घोषणा गरिएको उल्लेख छ।
आदेशमा विमानस्थलजस्तो संवेदनशील स्थानमा भेला तथा प्रदर्शनका कार्यक्रम हुँदा उत्तेजित भीडबाट तोडफोड, आगजनीलगायत उच्छृङ्खल गतिविधि हुन सक्ने जोखिम औँल्याइएको छ।
यद्यपि, निषेधित क्षेत्रबाहेकका स्थानमा भने संविधानले प्रत्याभूत गरेको विचार तथा अभिव्यक्तिको स्वतन्त्रता र विना हातहतियार शान्तिपूर्ण रूपमा भेला हुने अधिकारप्रति प्रशासन प्रतिबद्ध रहेको पनि स्पष्ट गरिएको छ।
यसैगरी, पूर्वजानकारी दिएर आयोजना गरिने विरोधका कार्यक्रमबाट सरकारी, सार्वजनिक वा व्यक्तिगत सम्पत्तिमा क्षति पुगेमा आयोजकबाट क्षतिपूर्ति असुल गरिने चेतावनी पनि प्रशासनले दिएको छ।
प्रतिक्रिया