काठमाडौं । पुनर्नियुक्ति पाएका अर्थमन्त्री विष्णुप्रसाद पौडेलले ३ वटा अस्पतालमा अक्सिजन प्लान्ट र पाईप लाईन जडान गर्ने निर्णयमा हस्ताक्षर गर्दै आफ्नो पदभार ग्रहण गरेका छन् । अर्थमन्त्रीको सपथ ग्रहण गरेलगत्तै पदभार ग्रहण गर्न अर्थमन्त्रालय पुगेका मन्त्री पौडेलले पुनर्नियुक्ति पछिको पहिलो निर्णय ३ वटा अस्पतालमा अक्सिजन प्लान्ट पाईपलाईन जडान गर्ने बनेको छ ।
उनले पदभारसँगै अर्थमन्त्री पौडेलले अक्सिजन प्लान्ट र पाइप लाइन जडानका लागि डडेलधुरा अस्पताल, पाटन स्वास्थ्य विज्ञान प्रतिष्ठान र भेरी अस्पताल नेपालगञ्जका लागि ५ करोड ८३ लाख २४ हजार रुपैयाँ उपलब्ध गराउने निर्णयलाई स्वीकृत गरेका छन् ।
पदभार ग्रहण गर्दै उनले कोभिड-१९ लाई रोकथाम तथा नियन्त्रण गर्न सम्पूर्ण शक्ति, स्रोत र सामर्थ्य परिचालित गरिने बताए । अर्थमन्त्री पौडेलले आगामी बजेट कोभिड-१९ लाई सामना गर्ने गरी आउने बताउँदै बजेट तयारीको अन्तिम चरणमा रहेको र कोभिड-१९ को महामारीले प्रभावित अर्थतन्त्रलाई पुनर्उत्थान र गतिशील बनाउने संकल्पकासाथ बजेट आउने बताए ।
कोभिड-१९ विरुद्धको लडाईंलाई थप सघन र प्रभावकारी बनाउने पौडेलको भनाई छ ।
पदभार ग्रहण गर्नुअघि अर्थमन्त्री पौडेललाई अर्थसचिव शिशिरकुमार ढुङ्गाना, राजस्व सचिव रामशरण पुडासैनी, सहसचिवहरु लगायतले स्वागत गरेका थिए ।
प्रतिक्रिया