कांग्रेस सभापति देउवालाई प्रधानमन्त्रीमा दाबी पेश गर्न नेताहरु राष्ट्रपति कार्यालयमा

काठमाडौं । १४९ जना सांसदको हस्ताक्षरसहित विपक्षी गठबन्धनका शीर्ष नेताहरु नयाँ सरकार दाबीका लागि राष्ट्रपति कार्यालय शितल निवास पुगेका छन् ।

कांग्रेस संसदीय दलका नेता शेरबहादुर देउवालाई नयाँ प्रधानमन्त्रीमा प्रस्ताव गर्दै शीर्ष नेताहरु राष्ट्रपति कार्यालय शितल निवास पुगेका हुन् । नेताहरुले राष्ट्रपति समक्ष सबै सांसदहरुको हस्ताक्षर बुझाउँदै देउवालाई नयाँ प्रधानमन्त्रीमा प्रस्ताव गर्न लागेका छन् ।

राष्ट्रपति विद्यादेवी भण्डारीले संविधानको धारा ७६ को उपधारा ५ अनुसार कुनै पनि सांसदले बहुमत पुर्याउनसक्ने दाबीसहित पेश गर्न आह्वान गरेकी थिइन । २१ घण्टाको समयसीमा मात्रै दिएपछि विपक्षी दलहरुले देउवाको पक्षमा १४९ जुटाउन सफल भएका छन् । देउवाको पक्षमा एमालेको माधवकुमार नेपाल पक्षका २७ जना सांसदहरुले हस्ताक्षर गरेका छन् । यस्तै जनता समाजवादी पार्टी जसपाका १३ जना सांसदहरुले हस्ताक्षर गरेका छन् भने कांग्रेस र माओवादी केन्द्रका सबै सांसदहरुको हस्ताक्षर रहेको छ ।

विपक्षी दलहरुबीच कांग्रेससभापति शेरबादुर देउवा निवासमा आज बिहान छलफल भएको थियो । त्यसपछि सबै दलहरुले आआफ्ना सांसदहरुको हस्ताक्षर संकलन गरेर पुनः दिउँसो ३ बजे कांग्रेस संसदीय दलको कार्यालय सिंहदबारमा शिर्ष नेताहरुको बैठक भएको थियो । त्यसअघि चारै पक्षका दोस्रो तहका नेताहरुले हस्ताक्षर संकलन र त्यसमाथि रुजु गर्ने काम गरेका थिए ।