यो कुनै मध्यावधी चुनाव हैन, संविधान खारेज गर्ने प्रपंच हो : डा.बाबुराम भट्टराई

काठमाडौं । पूर्व प्रधानमन्त्री एवम जनता समाजवादी पार्टी (जसपा)का संघीय परिषद अध्यक्ष डा. बाबुराम भट्टराईले राष्ट्रपति विद्यादेवी भण्डारीले घोषणा गरेका मध्यावधि निर्वाचन नभई संविधान खारेजको प्रपञ्च भएको बताएका छन् ।

शनिवार बिहान एक ट्वीट गर्दै डा. भट्टराईले भित्री बाहिरी प्रतिगामी शक्तिहरूको षड्यन्त्र र सेटिङमा फेरि प्रतिक्रान्तिकारी हर्कत शुरू हुनु राष्ट्रपति विद्यादेवी भण्डारी र प्रधानमन्त्री केपी शर्मा ओलीको कुकर्म रहेको बताएका छन् । यस्तै, उनले यसको प्रतिवादमा उत्रिन आह्वानसमेत गरेका छन् ।

उनले ‘गत पुस ५ बाट जुन अलोकतान्त्रिक,असंवैधानिक र प्रतिक्रान्तिकारी हर्कत शुरू भएको थियो त्यसैको कडी हो यो ओली-विद्या कुकर्म’ भन्दै संविधान खारेज गर्ने प्रपञ्च भएकाले प्रतिवादका लागि एकजुट हुन आव्हान गरेका छन् ।

ट्वीटमा लेखेका छन्, ‘भित्री-बाहिरी प्रतिगामी शक्तिहरूको षड्यन्त्र-सेटिंगमा गत पुस ५ बाट जुन अलोकतान्त्रिक,असंवैधानिक र प्रतिक्रान्तिकारी हर्कत शुरू भएको थियो त्यसैको कडी हो यो ओली-विद्या कुकर्म । यो कुनै मध्यावधी चुनाव हैन संघीय लोकतान्त्रिक गणतन्त्र र संविधान खारेज गर्ने प्रपंच हो । एकजुट होऊॅ : प्रतिवाद गरौं ।