राष्ट्रपति भण्डारीद्वारा नागरिकतासम्बन्धी अध्यादेश जारी

खबर कुरा
९ जेष्ठ २०७८, आईतवार
                 

काठमाडौं । राष्ट्रपति विद्यादेवी भण्डारीले जन्मसिद्धका सन्तानलाई वंशजको नागरिकता दिने अध्यादेश जारी गरेकी छिन् ।

मन्त्रिपरिषद बैठकले केहि दिन अघि नै पारित गरेर राष्ट्रपति कार्यालय पठाएको नेपाल नागरिकता (पहिलो संशोधन) अध्यादेश राष्ट्रपति भण्डारीले आज जारी गरेकी हुन् । भण्डारीले नेपालको संविधानको धारा ११४ (१) बमोजिम अध्यादेश जारी गरेकी हुन् ।

राष्ट्रपति भण्डारीले नेपाल सरकार र मन्त्रिपरिषद्को सिफारिसमा नेपाल नागरिकता (पहिलो संशोधन), अध्यादेश, २०७८ जारी गरेको राष्ट्रपति कार्यालयका सहायक प्रवक्ता केशव प्रसाद घिमिरेले जानकारी दिए ।

जनता समाजवादी पार्टी जसपाको महन्थ ठाकुर पक्षलाई खुशी तुल्याउन प्रधानमन्त्री ओलीले नागरिकता जस्तो संवेदनशील विषयलाई अध्यादेशमार्फत जारी गराएका छन् । जबकी यससम्बन्धी विधेयक संसदमा ओलीकै पार्टीको अडानका कारण वर्षौदेखि छलफलका नाममा अलपत्र पर्दै आएको थियो ।

अध्यादेश जारी भएसँगै अब हाल जन्मको आधारमा नागरिकता पाएका व्यक्तिका सन्तानले वंशजको नागरिकता प्राप्त गर्नेछन् । अहिलेसम्म यो व्यवस्था थिएन । मधेसकेन्द्रित दलको मागअनुसार प्रधानमन्त्री केपी शर्मा ओलीले नागरिकतासम्बन्धी अध्यादेश मन्त्रिपरिषदबाट पारित गराएका थिए ।

नागरिकतासम्बन्धी अध्यादेश जारी भएसँगै अब जसपाको ठाकुर पक्षलाई ओलीले सरकारमा भित्र्याउने तयारी गरेका छन् । स्रोतका अनुसार ओलीले राजेन्द्र महतोलाई उपप्रधान र गृहमन्त्री बनाउने भएका छन् ।

यसमा तपाइको मत

Your email address will not be published. Required fields are marked *


*