प्रधानमन्त्रीको आक्रोश : कालोकोटधारीले न्यायालयमा वितण्डा मच्चाए, ‘पूर्वप्रधानन्यायाधीसहरु आउटडेटेड इलेमेन्ट’

खबर कुरा
१७ जेष्ठ २०७८, सोमबार
                 

काठमाडौं । प्रधानमन्त्री केपी शर्मा ओलीले कानूनव्यवसायीहरुमाथि फेरि खनिएका छन् ।

पहिलोपटक प्रतिनिधिसभा विघटन विरुद्ध परेको मुद्दाका बहसकर्ता कानूनव्यवसायीहरुलाई तमासा देखाएको भन्दै आरोप लगाएका ओलीले फेरि अर्कोपटक पनि सोही आरोप लगाएका छन् ।

एमालेको युवा संघको केन्द्रीय सचिवालय बैठकलाई सम्बोधन गर्दै ओलीले आफुले भनेको न्यायाधीस नभए हुँदैन भनेर वकिलहरुले संवैधानिक इजलासमै तमासा देखाएको आरोप लगाएका हुन् ।

ओली विपक्षी गठबन्धनको पक्षमा वकालत गर्ने वरिष्ठ अधिवक्ताहरुले आफुले लेखेर दिएको फैसला सुनाउने न्यायाधीस खोजेर न्यायालयमा वितण्डा मच्चाएको जिकिर गरे । ओलीले प्रश्न गरे, ‘हामीले लेखेर दिएको फैसला पढेर सुनाउने न्यायाधीशमात्र मान्छौं भनेर कालोकोटधारीले न्यायपालिकालाई कुन हैसियतमा पुर्‍याउँदैछन् ?

ओलीले यसलाई गम्भीर विषय भएको बताउँदै उनीहरू न्यायाधीश छान्नेमात्र होइन फैसला पनि हामी नै दिन्छौं भनेको आरोप लगाए ।

ओलीले विगतमा जस्तै पूर्वप्रधानन्यायाधीसहरुप्रति पनि खनिए । पूर्वप्रधानन्यायाधीसहरुले वक्तव्यबाजी जारी गरेको आरोप लगाउँदै उनले भने ‘यसअघि न्यापालिकाको नेतृत्व गरेकाहरुको ताण्डव पनि देखिँदैछ । राज्यको पेन्सन खाएर न्यायालयको हुर्मत लिने ? आफ्नो कार्यकालमा केही नगर्ने, अहिले सडकमा हस्तक्षेपकारी ताण्डव गर्ने ? हाम्रो लोकतन्त्रलाई आउटडेटेड इलेमेन्टबाट जोगाइन्छ, जोगाउँछौं ।’

प्रधानमन्त्री ओलीले पहिलो पटक संसद विघटन गरेपछि त्यसविरुद्ध सर्वोच्च अदालतमा परेको रिटमाथि बहस गर्ने कानून व्यवसायीहरु र पूर्वप्रधानन्यायाधीसहरुलाई गाली गरेका थिए ।

यसमा तपाइको मत

Your email address will not be published. Required fields are marked *


*