काठमाडौं । जनता समाजवादी पार्टी महन्त महतो समूह र ओली सरकारकाबीच सत्ता समिकरणको मुख्य एजेण्डा बन्दै आएको जसपा नेता एवं निलम्बित सांसद रेशमलाल चौधरीको रिहाईका बिषयमा सरकारले थारु कल्याणकारिणी सभासँग पनि सहमती जनाएको छ । सरकार र कल्याणकारिणी सभाबीच आज भएको ६ बुँदे सहमतिमा पनि विघटित प्रतिनिधिसभा सदस्य रेशमलाल चौधरीको रिहाई गर्ने सहमती भएको हो ।
सहमतिअनुसार थरुहट–थारुवान आन्दोलनका क्रममा टीकापुरमा भएको घटनामा आरोपित धनीराम चौधरी, रेशमलाल चौधरी र लक्ष्मण चौधरीलगायतमाथि लगाइएको सम्पूर्ण मुद्दा फिर्ता र रिहाइका लागि संविधान र कानुनसम्मत पहल गर्न सरकारले सहमत भएको छ ।
सहमतिमा सरकारका तर्फबाट कानुन न्याय तथा संसदीय मामिला मन्त्री लिलानाथ श्रेष्ठ सहित राजन भट्टराई र भगवती चौधरीले हस्ताक्षर गरेका छन् भने सभाका तर्फबाट रुक्मिणी चौधरी, प्रेमीलाल चौधरी, पद्मनारायाण चौधरी, प्रभात चौधरी र चन्द्रप्रसाद चौधरीले हस्ताक्षर गरेका छन् ।
सहमति अनुसार आन्दोलनमा भएको क्षतिको मूल्यांकन गरेर क्षतिपूर्ति उपलब्ध गराउने, महिला र असहायमाथि दुर्व्यवहार गर्नेलाई छानबिन गरी कानुनी दायरामा ल्याइने लगायत उल्लेख छ ।
प्रतिक्रिया