काठमाडौं । एमाले अध्यक्ष एवं प्रधानमन्त्री केपी ओलीले २०७५ जेठ २ अघिको एमाले स्थायी कमिटीको बैठक बोलाउन सक्ने आंकलन गरिएको बेला प्रधानमन्त्री ओलीका विश्वास पात्र उपप्रधानमन्त्री बिष्णु पौडेल एमाले उपाध्यक्ष वामदेव गौतम भेट्न गौतम निवास पुगेका छन् ।
एमालेमा देखिएको पछिल्लो विवाद र फुट रोक्नका लागि सक्रिय पौडेल आईतबार गौतम भेट्न भैंसेपाटी पुगेको पौडेल निकट स्रोतले जनाएको छ ।
अध्यक्ष ओलीले २०७५ जेठ २ अघिको माधव नेपाल र झलनाथ खनालसहितको स्थायी कमिटी बोलाउने तयारी चर्चा चलिरहकै बेला पौडेलले गौतमसँग भेटघाट गर्नुलाई अर्थपूर्णरुपमा हेरिएको छ ।
भेटवार्तामा भएको छलफलको विषयमा भने स्रोतले खेलाउन चाहेन । माधव पक्षले नयाँ पार्टी खोलेमा आफ्नो साथ रहने गौतमको अभिव्यक्ति सार्वजानिक भएपछि वामदेवलाई ओली पक्षमै रोक्ने उद्देश्यले पौडेलले भेट गरेको अनुमान गरिएको छ । एमालेको पछिल्लो गतिबिधिमा गौतम मौन देखिएका छन् ।
पार्टी एकता अभियान चलाएका गौतमलाई दुबै पक्षले आफ्नो पक्षमा राख्न तानातान् गरिरहेका छन् । एमाले भित्रका दोस्रो पुस्ताका नेताहरुले गौतमकै एजेण्डामा एकताको प्रयास थालेपनि गौतमलाई भने सो प्रयासमा सहभागी बनाईएको छैन ।
प्रतिक्रिया