युरोकप फुटबल : चेक रिपब्लिकले विजयी सुरुवात

काठमाडौं । जारी युरोकप २०२० फुटबलमा चेक रिपब्लिकले विजयी सुरुवात गरेकाे छ । स्कटल्याण्डको हम्पडेन पार्क स्टेडियममा साेमबार भएकाे समूह ‘डी’ काे खेलमा चेक रिपब्लिकले घरेलु टाेलीलाई ०-२ गाेलले पराजित गरेकाे हाे ।

चेक रिपब्लिकलाई जित दिलाउन दुवै गाेल प्याट्रिक शिकले गरेका थिए । खेलमा जायन्ट किलरको छवि बनाएको घरेलु टाेली स्कटल्याण्डले गोलको केही अवसर बनाएको थियो । तर, स्कटल्याण्डले पाएको मौकालाई सदुपयोग गर्न सकेन ।

४२ औं मिनेटमा प्याट्रिकले हेडरमार्फत् गोल गर्दै चेक रिपब्लिकलाई सुरुवाती अग्रता दिलाएका थिए । कर्नरबाट आएको बललाई स्कट म्याकटोमिनेले ब्लक गरेपनि भ्लादिमिर कोउफलले गरेको क्रसलाई प्याट्रिकले हेडरमार्फत गोल गर्न सफल भएका थिए ।

यस्तै, ५२ औं प्याट्रिकले अग्रता दाेब्बर बनाए । थोमस सौउसेकले काउन्टर अट्याकमा फालेको पासमा ज्याक हेन्ड्रीले गल्ती गरेपछि स्कटल्याण्डका गोलकिपर डेभिड मार्सल अघि बढेको स्थितिमा प्याट्रिकले करिब ५० यार्डबाट गरेकाे प्रहार सिधैं गाेल भएकाे थियाे ।

चेकले पछिल्लोपटक २०१० मा स्कटल्याण्डलाई १-० ले पराजित गरेको थियो । जितसँगै समूह ‘डी’ को चेक रिपब्लिकले महत्वपूर्ण ३ अंक जोडेको छ । चेक रिपब्लिक शीर्ष स्थानमा रहेको छ ।

यस समूहमा इंग्ल्याण्ड ३ अंक जोडेर दोस्रो स्थानमा रहेकाे छ । क्रोएसिया अंक विहीन रहँदै तेस्रो स्थानमा रहेको छ । आइतबार भएकाे खेलमा इंग्ल्याण्डले क्रोएसियालाई १-० ले पराजित गरेकाे थियाे ।

स्कटल्याण्डले भने हारबाट प्रतियोगिताको सुरुवात गरेको छ । स्कटल्याण्ड समूहको पुछारमा रहेको छ ।