युरोकप फुटबल : पोर्चुगलको सानदार सुरुवात, रोनाल्डोले बनाए कीर्तिमान

काठमाडौं । युरोपको विभिन्न ११ शहरमा आयोजना भईरहेको १६ औं संस्करणको युरोकप फुटबलमा साविक विजेता पोर्चुगलले घरेलु टोली हंगेरीलाई हराउँदै विजयी सुरुवात गरेको छ ।

ग्रुप अफ डेथ मानिएको समूह समूह ‘एफ’को पहिलो खेलमा पोर्चुगलले खेलको अन्तिम समयमा लगातार तीन गोल गर्दै सुखद् सुरुवात गरेको हो ।

पोर्चुगलले अन्तिम समयमा एक मिनेटको अन्तरमा दुई गोल गरेको थियो । ८४ औँ मिनेटमा राफायल गुएर्रोले अग्रता दिलाएका थिए । त्यसको दुई मिनेट लगत्तै पोर्चुगलले पेनाल्टी प्रहारको मौका पाएको थियो जसमा क्रिस्टियानो रोनाल्डो सफल रहे । दोस्रो हाफको इन्जुरी समयको दोस्रो मिनेटमा उनले व्यक्तिगत दोस्रो गोल थपेका थिए ।

अन्तर्राष्ट्रिय फुटबलमा रोनाल्डोको गोल संख्या एक सय ६ पुगेको छ । उनी इरानका अलि दाईको कीर्तिमान बराबरी गर्नबाट ३ गोलले मात्र पछाडि छन ।

यो समूहमा फ्रान्स र जर्मनी पनि छन । यी दुई टोली केही बेरमा भिड्दै छन ।