एमाले नेपाल पक्षको स्थायी कमिटी बैठक बस्दै

नेकपा एमालेका अध्यक्ष केपी ओलीले २०७५ जेठ २ गते अगाडिको संरचना अन्तर्गत स्थायी कमिटीको बैठक बोलाउने चर्चा चलेसँगै एमालेको नेपाल पक्षले आफूनिकट स्थायी कमिटीको बैठक बोलाएको छ ।

अध्यक्ष ओलीले बोलाउने तयारी गरेको भनिएको स्थायी कमिटीको बैठक तथा सर्वोच्च अदालतले दशौं महाधिवेशन आयोजक कमिटीलाई अवैधानिक भनेको अवस्थाका बारेका नेपाल पक्षको बैठक बस्न लागेको बताईएको छ । बैठकमा उपचारका क्रममा दिल्ली जानु अघि वरिष्ठ नेता झलनाथ खनालबाट आएको विज्ञप्तिका बिषयमा पनि छलफल हुने नेपालपक्षका एक नेताले बताए ।

खनालको विज्ञप्तिका सम्बन्धमा एमालेका नेपाल पक्षकै अर्का नेता जगन्नाथ खतिवडाले झलनाथको भावना बिपरित विज्ञप्ति आएको टिप्पणी गरेका थिए ।

बैठकले विपद् व्यवस्थापनबारे सरकारलाई ध्यानाकर्षण गराउनुका साथै उद्धार तथा राहतमा केन्द्रित हुन कार्यकर्तालाई निर्देशन दिने ती नेताले बताए ।