काठमाडौं । मेलम्चीको खानेपानी काठमाडौंबासीलाई ल्याएको गुन तिर्दै काठमडौं महानगरपालिकाले मेलम्ची र हेलम्बुका बाढीपीडितलाई अािर्थक सहयोग गरेको छ ।
काठमाडौं महानगरले मेलम्ची र हेलम्बुका बाढी प्रभावितलाई २ करोड रुपैयाँ सहयोग गर्ने घोषणा गरेको हो ।
महानगर प्रमुख विद्यासुन्दर शाक्यले बिहीबार काठमाडौं महानगरपालिकाकाको आगामी आर्थिक वर्षको नीति तथा कार्यक्रम सार्वजनिक गर्दै बाढीपीडितलाई आर्थिक सहयोगको घोषणा गरेका हुन् । यो रकम उद्दार तथा राहत खर्चका लागि दिइने शाक्यले बताएका छन् ।
काठमाडौंबासीको खानेपानीको मुख्य स्रोत बनेको मेलम्ची खानेपानी आयोजनाको मुहानस्थलमै भीषण बाढीपहिरो जाँदा ६ जनाको मृत्यु भएको थियो भने २० जना भन्दा बढी वेपत्ता भएका छन् । यस्तै हेलम्बु र मेलम्चीमा दर्जनौं घर डुबानमा परेका छन् । करोडौंको भौतिक क्षति भएको छ । सयौं स्थानीय घरबारबिहीन भएका छन् ।
काठमाडौं महानगरपालिकाले आफ्नालागि खानेपानी दिएका कारण सिन्धुपाल्चोकका यी दुई नगरपालिका र गाउँपालिकालाई आर्थिक सहयोग दिएको हो ।
प्रतिक्रिया