काठमाडौं । नेपाली कांग्रेससका सभापति शेरबहादुर देउवाले प्रधानमन्त्री केपी शर्मा ओलीको अहंकारले देशलाई संकटतर्फ धकेल्ने काम भएको बताएका छन् ।
पाँच विपक्षी गठबन्धनका शीर्ष नेताहरुद्वारा मिडियाका सम्पादहरुसँगको अन्तक्र्रियामा सभापति देउवाले प्रधानमन्त्रीको अहंकार र त्यसलाई साथ दिने राष्ट्रपतिको कदमका कारण देश संकटको भूमरिमा पुगेको जिकिर गरेका हुन् ।
देउवाले प्रतिनिधिसभा विघटनले मुलुकमा लोकतन्त्रमाथि नै खतरा देखिएको बताए । ओलीको कारण संविधान संकटमा परेको जिकिर गर्दै उनले भने, ‘दुई पटक संसद विघटन, अध्यादेशबाट मुलुक सञ्चालन गर्ने खोज्ने काम भएको छ । यसले मुलुकलाई संकटमा धकेल्न काम भएको छ । यसविरुद्ध संघर्षमा उत्रनुप आवश्यक भयो ।’
आफुले १४९ जना सांसदको हस्ताक्षरसहित प्रधानमन्त्रीमाथि गरेको दावीलाई अस्वीकार गरेर राष्ट्रपतिले लोकतान्त्रिक मूल्य मान्यतामाथि नै प्रहार गरेको पनि उनले आरोप लगाए । संविधान, लोकतन्त्रको रक्षाका लागि नागरिक समाज, बुद्धिजीवि वर्गको सहकार्य आजको आवश्यक रहेको देउवाले बताए ।
शासकीय अहंकार र स्वेच्छाचारी प्रवृत्तिका कारण ओलीले अध्यादेशमार्फत शासन चलाउने, न्यायालय, संवैधानिक निकाय र राज्य संयन्त्रहरुमाथि नियन्त्रण गरेको जिकिर गरे ।
राज्यसत्ता कब्जामा मात्रै ध्यान दिएको सरकारले कोरोना महामारी नियन्त्रण र प्राकृतिक विपत्तीबाट जनधनको सुरक्षा गर्न नसकेको आरोप लगाए । देउवाले भने, ‘कोरोना महामारीबाट जनतालाई सुरक्षित तुल्याउनको लागि जिम्मेवारपूर्ण पाइला चाल्नुपर्नेमा पहिलो खोप लगाएका मानिसहरुका दोस्रो खोप नपाउने स्थिति सिर्जना गर्ने, बाढी, पहिरो र डुबान जस्ता प्राकृतिक विपत्तिबाट जनधनको सुरक्षाका लागि कुनै पूर्व तयारी नगर्ने जस्ता गैरजिम्मेवार कार्य प्रधानमन्त्रीबाट भएका छन् ।
देउवाले पाँच दलको गठबन्धनले जनजीविकाका सबालमा दबाब सिर्जना गर्ने बताउँदै त्यसका लागि आवश्यक परे जनपरिचालन गरिने बताए ।
प्रतिक्रिया