असार १८ देखि सबैखाले सवारी संचालन गर्ने यातायात व्यवसायी र मजदुर संगठनको चेतावनी

काठमाडौं । यातायात व्यवसायी र मजदुरका संघ संगठनहरुले असार १८ गतेबाट सबै प्रकारका सवारी साधान संचालन गर्ने घोषणा गरका छन् ।

उनीहरुले सोमबार एक विज्ञप्ति प्रकाशित गर्दै असार १५ गतेबाट सार्वजनिक सवारी संचालन गर्न सरकारले गरेको निर्णय अमान्य भएको जिकिर गर्दै १८ गतेबाट सबै सवारी संचालन गर्ने चेतावनी दिएका हुन् ।

विज्ञप्ति निकाल्नेमा नेपाल यातायात व्यावसायी राष्ट्रिय महासंघ, नेपाल यातायात मजदुर संघ, अखिल नेपाल यातायात मजदूर संघ र नेपाल यातायात स्वतन्त्र मजदुर संगठन रहेका छन् ।

काठमाडौं उपत्यकाका प्रमुख जिल्ला अधिकारीहरुको बैठकले भोलिदेखि २५ सिट भन्दा बढी क्षमताका मात्र बस जोर विजोर प्रणालीअनुसार चलाउन दिने निर्णय गरेको थियो । तर, व्यवसायी र मजदुर संघसंगठनहरुले भने सबैप्रकारका सवारी साधान चलाउन पाउनपर्ने माग गरेका छन् ।

उनीहरुले यातायात व्यवसायी र मजदुरलाई कोरोना खोपको व्यवस्था मिलाउन पनि माग गरेका छन् ।