काठमाडौं । सर्वोच्च अदालतले माओवादीको सिफारिसमा निर्वाचन आयोगले पदमुक्त गरेका दुई जना जनप्रतिनिधिको पद थमौती गरेको छ ।
रौतहटको मौलापुर नगरपालिकाकी मेयर रिनाकुमारी साह र कटहरिया नगरपालिकाका मेयर सियाराम कुशवाहलाई पदमुक्त गर्ने निर्वाचन आयोगको निर्णय तत्काल कार्यन्वयन नगर्न सर्वोच्चले अन्तरिम आदेश दिएको छ ।
मंगलबार न्यायाधीश कुमार चुँडालको एकल इजलासले साह र कुशवाहले दायर गरेको रिटमाथि सुनुवाइ गर्दै रिट निवेदकले माओवादी केन्द्र छोडेको या अर्को दलमा प्रवेश गरेको एकिन नभएको तर्क गर्दै पद थमौती गर्ने आदेश दिएको हो ।
आदेशमा मुद्दाको टुंगो नलाग्दासम्म निर्वाचन आयोगले गरेको निर्णय कार्यन्वयन नगर्न भनिएको छ ।
माओवादीका पूर्व नेता एवं पूर्वमन्त्री प्रभु साहकी श्रीमती रिना र प्रभुकै सहयोगी रहेका सियाराम कुशवाहा प्रभु साहसँगै एमालेमा प्रवेश गरेका थिए । माओवादी केन्द्रले आफ्नो दल त्याग गरेर एमाले प्रवेश गरेका दुवैजनासहित १४ जना स्थानीय जनप्रतिनिधिको पद रिक्त गर्न निर्वाचन आयोगमा निवेदन दिएको थियो । सो निवेदनको आधारमा असार ११ गते आयोगले उनीहरू पदमुक्त भएको सूचना निकालेको थियो ।
प्रतिक्रिया