नेपालगन्ज । कागजीरुपमा कायम रहेको बाँकेको निषेधाज्ञालाई थप खुकुलो बनाउँदै असार ३१ गते सम्मका लागि लम्ब्याईएको छ । कहिँ कतै कार्यान्वयन नदेखिएको निषधाज्ञालाई जिल्ला प्रशासन कार्यालय बाँकेले असार ३१ गते मध्यराती सम्मका लागि लम्ब्याएको हो ।
बाँकेका प्रमुख जिल्ला अधिकारी शिवराम गेलालले जारी गरेको निषधाज्ञा आदेशमा आजबाट सावैजानिक सवारी साधनहरु पनि निर्वाध चल्न पाउने उल्लेख गरिएको छ । गत असार १५ गतेबाट जोर बिजोर प्रणाली लागु गर्दै सवारी साधन संचालन गर्न आदेश गरिएपनि बाँकेमा कुनै कार्यान्वयन भएको थिएन । निषेधाज्ञाका अन्य मापदण्डलाई पूर्ववतः कायम राखिएको छ ।
कोरोनाको दोस्रो लहर सुरु भएसँगै नेपालमै पहिलो (बैशाख ८ बाट नेपालगन्ज र बैशाख १३ बाट बाँके जिल्लाभर) निषेधाज्ञा जारी भएको बाँकेमा बैशाख महिना भरी निषेधाज्ञाको केहि कार्यान्वयन भएपनि त्यस यता निषेधाज्ञाको कुनै प्रभाव देखिएको छैन । संक्रमणको सबै भन्दा बढी जोखिम खेपेको नेपालगन्ज उपमहानगरमा जेठ महिनाको मध्य तिरबाटै होटल रेष्टेरेन्ट देखि चाट पानीपुरीका पसलहरु समेत संचालनमा रहेका छन् ।
प्रशासनको सुचनामा भने कोभिड १९ संकट व्यवस्थापन अध्यादेश देखि स्थानीय प्रशासन ऐन २०२८ बमोजिम कारवाही गर्ने चेतावनी दिईएको छ ।
प्रतिक्रिया