बुटवल । लगातार वर्षाका कारण पूर्वपश्चिम राजमार्गको नारायणगढ बुटवल सडकखण्ड अवरुद्ध भएको छ ।
नवलपुर जिल्लाको (बर्दघाट–सुस्तापूर्व) को कावासोती थानाचोक नजिकै बाढीले राजमार्गको ह्युमपाइप बगाउँदा राजमार्ग अवरुद्ध भएको हो ।
जिल्ला प्रहरी कार्यालय नवलपुरले दिएको जानकारी अनुसार कावासोतीमा सडक भासिएको छ । सडक भासिएपछि अहिले पुर्वपश्चिम राजमार्ग अवरुद्ध रहेको प्रहरी उपरीक्षक प्रकाश मल्लले बताए ।
राजमार्ग अवरुद्ध भएपछि सवारी साधन ठप्प भएका छन् । कावासोती क्षेत्रमा वर्षा हुने क्रम नरोकिएकाले राजमार्ग संचालन गर्न कठिनाई भएको मल्लले बताए ।
लगातार भएको वर्षाका कारण नवलपुरको सदरमुकाम कावासोती र देवचुलीको दलदले बजार डुबानमा परेका छन् ।
आज बिहानदेखि अवरुद्ध भएको सडक सञ्चालनको तयारी भइरहेको एसपी मल्लले बताए । शुरुमा साना सवारी साधनका लागि डाइभर्सन बनाउने काम भईरहेको जनाउंदै उनले ठूला सवारी साधनको आगामन खोल्न भने केही समय लाग्ने बताए ।
सडक अवरुद्ध हुँदा पूर्वपश्चिम राजमार्ग भएर चल्ने सवारी साधनहरु राजमार्गमै अलपत्र परेका छन् ।
प्रतिक्रिया