काठमाडौं । सरकारमा सहभागी हुने मन्त्री छान्नका लागि नेकपा माओवादी केन्द्रले स्थायी कमिटी बैठक बोलाएको छ ।
पार्टी केन्द्रीय कार्यालय पेरिसडाँडामा बसिरहेको बैठकमा शेरबहादुर देउवाको नेतृत्वमा आज गठन हुने सानो आकारको मन्त्रिपरिषद्मा सहभागी हुने सदस्यको नाम निक्र्यौल गर्ने बताइएको छ ।
राष्ट्रपति कार्यालयले देउवालाई साँझ ५ बजे सपथ ग्रहण गराउने तयारी गरेको छ । देउवाले आफ्नै पार्टीका दुई जना र माओवादी केन्द्रबाट दुई जना समेटेर पहिलो चरणमा पाँच सदस्यीय मन्त्रिपरिषद् गठनको तयारी गरेका छन् ।
माओवादी केन्द्रले आफ्नो तर्फबाट आज पठाउने दुई जना र मन्त्रिपरिषद्ले पूर्णता पाउने बेलामा प्राप्त गर्ने कुल मन्त्रीको संख्याका आधारमा पार्टीका नेताहरुमध्येबाट मन्त्री चयन गर्नेछ ।
स्थायी कमिटी बैठकले समानुपातिक समावेशी आधारमा मन्त्री छान्ने जिम्मा अध्यक्ष पुष्पकमल दाहाल प्रचण्डलाई दिने एक नेताले बताएका छन् ।
प्रतिक्रिया