नगर प्रमुखकै घरमा कार्यालय सञ्चालन

खबर कुरा
२ श्रावण २०७८, शनिबार
                 

महोत्तरी । महोत्तरीको भङ्गाहा नगरपालिकामा नगर प्रमुखकै घरमा नगर कार्यपालिकाको कार्यालय सञ्चालन भएको छ ।

भङ्गाहा-५ सीतापुरमा नवनिर्मित आफ्नो निजी पक्की घर नगर प्रमुख सञ्जिवकुमार साहले कार्यालय सञ्चालनका लागि निःशुल्क उपलब्ध गराएका हुन् ।

नगर प्रमुख साहले नगरपालिकाको कार्यालय भवन नबनुञ्जेलसम्म घरभाडा नलिने गरी कार्यालय सञ्चालन गर्न नयाँ भवन उपलब्ध गराएका कार्यालयका प्रमुख प्रशासकीय अधिकृत धर्मानन्द जोशीले जानकारी दिए ।

‘नगर प्रमुख साहले लिखित सम्झौता गरेरै भवन उपलब्ध गराउनुभएपछि नयाँ आर्थिक वर्ष प्रारम्भसँगै कार्यालय सारिएको छ,’ जोशीले भने, ‘अब मासिक ६० हजार रुपैयाँ बचत हुने भयो ।’

नगरपालिकाको आफ्नै भवन नहुँदा यसअघि सीतापुरमै मासिक ६० हजार रुपैयाँ लाग्ने भाडाको घरमा कार्यालय सञ्चालन हुँदै आएको थियो । नगर प्रमुख साहले आफू बसोबासका लागि अर्को घर रहेको हुँदा नवनिर्मित भवन कार्यालय सञ्चालनका लागि निःशुल्क उपलब्ध गराएको बताए ।

नयाँ आव २०७८/०७९ भित्र भवन निर्माण भइसक्ने साहको भनाइ छ । पक्की घरमा २० भन्दा बढी कोठा छन् । रासस

यसमा तपाइको मत

Your email address will not be published. Required fields are marked *


*