काठमाडौं । २२ सांसदलाई तत्कालै कारवाही गर्नुपर्ने माग गर्दै एमाले केन्द्रीय कमिटी बैठकमा केही सदस्यहरुले हुटिङ गरेका छन् ।
ललितपुरको च्यासलमा जारी १०औं केन्द्रीय कमिटी बैठकमा महेश बस्नेत, खिमलाल भट्टराई, कृष्ण राई लगायतका केन्द्रीय सदस्यहरुले तत्कालै २२ सांसदलाई कारवाही माग गरेका छन् ।
अध्यक्ष केपी शर्मा ओलीले माधवकुमार नेपालसहित २२ जना सांसदलाई अनुशासनको कारवाही गर्न २४ घण्टे स्पष्टीकरण सोध्ने प्रस्ताव राखेपछि उनीहरुले तत्काल हलबाटै कारवाही गर्नुपर्ने माग गरेका हुन् । त्यसपछि केहीबेर बैठककक्षमा केन्द्रीय सदस्यहरुले होहल्ला गरेका थिए ।
एमालेको जारी केन्द्रीय कमिटी बैठकमा अध्यक्ष ओली समर्थकहरु मात्र सहभागी छन् । ओली निकट केन्द्रीय सदस्यहरुले पार्टीको अनुशासन उल्लंघन गर्ने जो कोहीलाई दण्डित गर्नुपर्ने माग गरेका हुन् ।
नेपालसहितका २२ जना सांसदले सोमबार राति पार्टीको निर्देशन विपरित शेरबहादुर देउवालाई विश्वासको मत दिएका थिए । नेपाल पक्षका मात्र नभएका ओली पक्षकै ८ जना सांसदले समेत फ्लोर क्रस गरेका थिए । नेपाल पक्षका ११ जना सांसदले भने पार्टी एकता वचाउने भन्दै विपक्षमा मतदान गर्ने पार्टीको निर्देशनलाई समेत अवज्ञा गर्दै मतदान बहिस्कार गरेका थिए ।
पार्टीको विवाद समाधाका लागि गठित कार्यदलको १० बुँदे सुझाव अनुसार पार्टीको १०औं केन्द्रीय कमिटी बैठक भने पनि २०७५ जेठ २ गतेयता थपिएका केन्द्रीय सदस्यहरु समेत सो बैठकमा सहभागी छन् ।
प्रतिक्रिया