काठमाडौं । कर्णाली राजमार्गमा मात्र पछिल्ला ४ वर्षको अवधिमा थप १२ वटा पक्की पुल निर्माण भएका छन् । आर्थिक वर्ष २०७३/७४ देखि शुरू भई गत आर्थिक वर्ष २०७७/७८ को अवधिमा यो राजमार्गमा सो संख्यामा पुलको निर्माण सम्पन्न भएको हो ।
सडक विभागका महानिर्देशक अजुनजङ्ग थापाले कर्णाली राजमार्गको विस्तार र स्तरोन्नति गर्ने कार्यक्रम अन्तर्गत १२ वटा नयाँ पक्की पुलको निर्माण सम्पन्न भएको जानकारी दिए । पश्चिम नेपालको सुर्खेतबाट दैलेख र कालीकोट हुँदै कर्णाली नदीको किनारै किनार भएर जुम्लासम्म पुग्ने मार्गलाई कर्णाली राजमार्ग भनिन्छ ।
महानिर्देशक थापाका अनुसार सो राजमार्गको माटे खोला, तीला खोला, कुवा खोला, लुम्चडी खोला, गुहेगाड खोला, काले खोला, पाल्तडा खोला, कानेगाड खोला, दही खोला, छिडेना खोला, सिँजा खोला र पातले खोलामा पुल निर्माण सम्पन्न भएका छन् ।
ती पुलहरूको निर्माणका लागि आर्थिक वर्ष २०७३/७४ मा विभिन्न निर्माण कम्पनीसँग सम्झौता भएको थियो । करीब ४३ करोड रुपैयाँको लागतमा निर्माण सम्पन्न भएका ती पुल २ लेनका छन् ।
तीला खोलाबाहेकका पुलको निर्माण २०७४ जेठदेखि निर्माण शुरू भई गत आर्थिक वर्षको माघभित्रमा नै सम्पन्न भएका हुन् । तीला खोलाको पुल निर्माणका लागि २०७५ सालमा सम्झौता भई यस वर्षको जेठमा सम्पन्न भएको थियो । १ दशकअघि २०६३ चैत महिनाको ३० गतेदेखि सञ्चालनमा आएको कर्णाली राजमार्गको कूल लम्बाइ २३२ किलोमिटर रहेको छ ।
विश्व बैंकको आर्थिक सहयोगमा निर्माण सम्पन्न भएको राजमार्गको सुर्खेत-जुम्ला राजमार्ग नामकरण गरिएको थियो । अहिले मुलुकभरि १ हजार ५०० नयाँ पुल निर्माणाधीन अवस्थामा रहेका छन् । आजको गोरखापत्र दैनिकमा भउचप्रसाद यादवले लेखेका छन ।
प्रतिक्रिया