काठमाडौं । निर्वाचन आयोगले जनता समाजवादी पार्टीको आधिकारिकताबारे उपेन्द्र यादवको पक्षमा फैसला गरेको छ ।
सोमबार आयोगले जसपाका ५१ जना कार्यकारिणी सदस्यहरुको हेड काउन्ट गरेपछि अध्यक्ष यादवको पक्षमा जसपा रहने फैसला गरेको हो ।
५१ जना सदस्यमध्ये यादवको पक्षमा ३४ जना उभिएका थिए भने अर्का अध्यक्ष महन्थ ठाकुरको पक्षमा १६ जना मात्र उभिए । जेलमा रहेका रेशम चौधरीले आफु कुनै पक्षमा नलाग्ने भन्दै तटस्थ बसे ।
आयोगले आधिकारिकता प्रदान गरेसँगै अब जसपाको झण्डा र चुनाव चिन्ह यादव पक्षको भएको छ । ठाकुर पक्षसँग कार्यकारिणीको ४० प्रतिशत संख्या नपुगेका कारण उनले दल विभाजन गर्न सक्ने अवस्था समेत रहेन ।
आयोगको निर्णयसँगै जसपाको बहुमतले अध्यक्ष ठाकुरसहित राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई गरेको कारवाही पनि वैध भएको छ । जसका कारण चारै जना नेताहरु पार्टीबाट स्वतः निस्काशित भएको नेता मोहम्मद इस्तियाक राईले बताएका छन् ।
अब ठाकुर पक्षले नयाँ दल दर्ता गर्नुपर्ने भएको छ । तर, नयाँ दल दर्ता गर्ने वित्तिकै जसपाबाट निर्वाचित सांसद र जनप्रतिनिधिहरु जसजसले ठाकुर पक्षलाई समर्थन गर्छन्, उनीहरुको पद स्वतः रिक्त हुने भएको छ ।
आयोगले जसपाको आधिकारिकता विवाद निरुपणका लागि इजलास गठन गरी यही साउन ३ देखि ७ गतेसम्म कानूनी बहस सकेर पार्टी एकीकरण हुँदाका समयमा पेश भएका कागजातसहित उपस्थित हुन आदेश दिएको थियो ।
प्रतिक्रिया