काठमाडौं । देउवा सरकारमा सहभागी हुने चर्चाको शिखरमा रहेको नेकपा एमालेको नेपाल पक्ष अन्ततः सरकारमा सहभागी नहुने भएको छ । नेपाल पक्षको आज बसेको उपलब्ध स्थायी कमिटीको बैठकले सरकारमा सहभागी नहुने निष्कर्ष निकालेको हो । पार्टी एकता प्रक्रिया चलिरहेको र अर्को पार्टी बनाउने योजना पनि नभएका कारण सरकारमा सहभागी नहुने निर्णय भएको नेपाल पक्षका एक नेताले बताएका छन् ।
सत्तापक्षीय गठबन्धनले नेपाल पक्षलाई सरकारमा सामेल गराउन निकै प्रयास गरेपनि नेपाल पक्षले सहभागी नहुने करिव निश्चित भएको छ । नेपाल पक्षका प्रभावशाली नेता बदेराम भुसालले सरकारमा सहभागी हुन शेरबहादुर देउवालाई विश्वासको मत नदिएको स्पष्ट पार्दै एकताबद्ध एमाले बनाउने अभियान जारी रहेकाले सरकारमा सहभागी हुने कुरै नहुने बताए ।
नेपाल निकट सांसदहरुले पनि एकतावद्ध एमालेको पक्षमा धारणा राख्दै वरिष्ठ नेता माधवलाई सरकारमा जान हतार नगर्न सुझाव दिएको नेपाल पक्षको उच्च स्रोतले दाबी गरेको छ ।
नेता नेपालले बुधबार दिउँसो २२ सांसदसँग भएको छलफलमा नेता नेपालले सरकारमा सहभागी हुन नसकिने जानकारी सांसदहरुलाई दिएका थिए ।
छलफलका क्रममा अधिकांश सांसदले नेता नेपाललाई देउवा सरकारमा सहभागी हुन ठीक नहुने सुझाव दिएका थिए । देउवालाई माधव समूहका १४ र अध्यक्ष केपी शर्मा ओली समूहका आठ सांसदले विश्वासको मत दिएका थिए ।
प्रतिक्रिया