बुटवल । शंकर पोखरेल नेतृत्वमा रहेको लुम्बिनी प्रदेश सरकार हटाउन प्रदेशका विपक्षी दलको गठबन्धनले एक पछि अर्को कदम अगाडि बढाएका छन् । सोमबार मात्र प्रदेश प्रमुख समक्ष संविधानको धारा १६८(२) अनुसार बहुमत सरकार गठन गर्न प्रस्ताव आह्वान गर्न समावेदन बुझाएका विपक्षी गठबन्धनले आज प्रदेश सरकारका विरुद्ध अविश्वासको प्रस्ताव दर्ता गराउने भएको छ ।
विपक्षी गठबन्धको तर्फबाट प्रदेश प्रमुख समक्ष प्रदेशसभाको विशेष अधिवेशन आह्वानको लागि निवेदन गर्ने र संसद सचिवालयमा सरकारका विरुद्ध अविश्वासको प्रस्ताव दर्ता गरिने नेपाली कांग्रेस संसदीयदलका प्रमुख सचेतक फकरुद्दिन खानले बताए ।
गत शुक्रबार देखि नै सम्पर्क बिहिन रहेर सोमबार अज्ञात स्थलबाट एमालेमा रहेको विज्ञप्ति सार्वजनिक गरेकी सांसद विमलाकुमारी खत्री वलीको समेत हस्ताक्ष्र अविश्वासको प्रस्तावको निवेदनमा प्रयोग गरिएको विपक्षी गठबन्धन स्रोतले दाबी गरेको छ ।
विमला वली आफै सार्वजनिक भएर एमाले प्रवेश गरेको घोषणा नगर्दा सम्म उनलाई माओवादी केन्द्रकै सांसद मानिने माओवादी केन्द्रका सांसद आईपी खरेलले बताए । ‘मिडीयामा आफै आएर एमाले भएको बताएको दिन कानुन बमोजिम होला, त्यस अगाडि उनी मोआदी कै सांसद हुन् ।’ उनले भने ।
सांसद वलीले एमालेमा रहेको विज्ञप्ति सार्वजनिक गरेपनि अहिले सम्म उनको कसैसँग सम्पर्क हुन सकेको छैन । उनी संलग्न दल माओवादी केन्द्र र संचारकर्मीहरुको समेत वलीले मोबाइल उठाएकी छैनन् ।
प्रतिक्रिया