काठमाडौं । काठमाडौं उपत्यकामा जारी निषेधाज्ञा एक साता लम्ब्याइएको छ । उपत्यकाका तीन जिल्ला प्रमुख अधिकारीको मंगलबार बसेको बैठकले साउन २१ देखि २७ गतेसम्म निषेधाज्ञा लम्ब्याइएको हो ।
पछिल्लो समय जारी निषेधाज्ञा बुधबार राति १२ बजे सकिँदैछ । साबिककै निर्णयहरूलाई कडाइका साथ पालना गर्ने गरी एक साता निषेधाज्ञा लम्ब्याउने निर्णय गरिएको काठमाडौंका जिल्ला प्रमुख अधिकारी कालीप्रसाद पराजुलीले जानकारी दिए ।
जारी निषेधाज्ञामा सबै प्रकारका सभा, सम्मेलन, पार्टी प्यालेस, सिनेमा हल, रेष्टुरेन्ट, डान्सबार, दोहोरीलगायत सञ्चालनमा प्रतिबन्ध लगाइएको छ ।
शैक्षिक संस्थाहरूमा पनि भौतिक उपस्थितिमा पठनपाठन बन्द गरिएको छ । थपिएको निषेधाज्ञामा पनि यसलाई निरन्तरता दिइएको छ ।
पहिलाकै अनुसार औषधि तथा स्वास्थ्य सामग्रीका पसलबाहेक अरू पसल तथा व्यवसायहरू साँझ ७ बजेसम्म मात्रै सञ्चालन गर्न अनुमति दिइएको छ ।
आदेशअनुसार रेष्टुरेन्ट तथा फास्ट फुड, अनलाइन अर्डर र टेक अवेका सेवा साँझ ७ बजेसम्म मात्रै सञ्चालन गर्न पाइनेछ ।
मंगलबार मात्रै काठमाडौं प्रशासनले निषेधाज्ञाको उल्लंघन गर्ने र स्वास्थ्य मापदण्डको पालना नगर्नेलाई कडा कारबाही गर्ने चेतावनी दिएको छ ।
प्रतिक्रिया